BINTULU: Lima rumah di MLNG Housing, Fasa 2, Jalai Abang Usop, Kidurong angus kena malam 31 Mei tu tadi lebuh mensia mayuh benung richah ngintu pengerami Gawai Dayak.

Berindik ari penyadi penusah nya, Sapit Menteri Infrastruktur enggau Pemansang Penyangkai Kapal II ti mega Kaban Kunsil Nengeri (ADUN) Samalaju, Dato Majang Renggi berumban ngesah endur penusah angus nyadi seraya betemu enggau raban tasah angus.

Iya madah ke diri berasai sinu ngenang nasip raban tasah angus kelebih agi maya komuniti Dayak benung ngintu Gawai Dayak.

“Tu udah tentu siti penguji ti chukup berat ngagai ruang bilik ti dituntung penusah angus,” ku iya.

Ba pejalai ngabas nya, Dato Majang ti disempulang pengari Opis Pelilih Bintulu, Polis DiRaja Malaysia (PDRM), Opis Bomba enggau Penyah Penusah Malaysia (BOMBA), Raban Penyangga Orang Periman Malaysia (APM) enggau Opis Pengintu Pengelantang Komuniti (JKM) ngambi berati ke penyadi penusah nya sereta berandau pasal bantu ngenyit ti ulih dianjung.

“Kami benung berundingka bantu tumu nyengkaum endur diau sementara sereta meri sukung ngagai raban tasah angus ngambi sida enda diteju kediri napi penguji tu,” ku iya.

Dato Majang mega meri terima kasih ngagai semua raban kelebih agi raban bomba ti sikar nyerara api ari nyerarai ngagai rumah bukai.

“Aku chukup ngenang enggau meri terima kasih ngagai raban gawa ba luan ti sikar bejalaika pengawa nyengkaum PDRM, BOMBA, APM, enggau JKM nentuka pengelikun peranak,” ku Dato Majang.

Iya mega besampika semua raban tasah angus liat ati enggau diberi pengering ngepunka pengidup baru.

Naka diatu, pun penusah angus agi dipansik raban bekuasa.

Nya alai, mensia mayuh dilalau bejejaga kelebih agi maya musin pengerami ti suah bekenaka karan enggau bepandukka lauk. – EDISI UKAS