BINTANGOR: Kaban Kunsil Nengeri (ADUN) Meradong, Datuk Ding Kuong Hing nampung tradisyen ngabang serimbai pengerami Gawai Dayak lebuh ngabang ngagai 10 rumah panjai ngelingi sitak Sungai Meradong, Kampung Sri Kenyalang, Sungai Kelupu enggau Sungai Tulai, ditu kena Hari Tiga.

Sama nyempulang iya nya Sapit Chairman Parti Sa’ati Rayat Sarawak (SUPP) Pampang Bintangor, Chieng Boung Ong; Sekretari SUPP Pampang Bintangor, Lau Sie Hing; Tukang Wang SUPP Pampang Bintangor, Lee Ngin Soon sereta Kapitan Wong Leh Hee.

Ku Datuk Ding, taja pengerami Gawai Dayak udah datai ba hari keempat tang rumah panjai ti digusung iya tetap richah enggau bemacham program komuniti ti diatur Komiti Pemansang enggau Pengelikun Genturung Pendiau (JKKK).

Berebak enggau nya, iya ngena peluang nya begulai, mendingka terus peminta peranak seraya ngenataika penerang pemadu baru pasal bemacham inisiatif Perintah Sarawak.

Entara inisiatif ti diterang nyengkaum bekaul Kenyalang Gold Card (KGC), Bantu Barang Diguna Sarawak (SKAS), Program Pemaik Pengerai Orang Tuai Sarawak (SCHB), Bantu Indai Baru Beranak (BIB) enggau Endowment Fund Sarawak (EFS) ke alai semua nya dikena ngelempung tating rayat kelebih agi ba menua pesisir. – EDISI UKAS