KUCHING: Unit Komunikasi Awam Sarawak (UKAS) deka nanggam kerejasama enggau Pustaka Negeri Sarawak nyadi bakih strategik ba bemacham pekara kelebih agi ba sukut ngenataika polisi enggau inisiatif perintah nengeri ngagai mensia mayuh.

Pekara nya dipadahka Direktor UKAS, Awang Putrayusrie Awang Redzuan maya ngetuai deligit UKAS ngatur penemuai basa ngagai Tuai Pegawai Eksekutif (CEO) Pustaka Negeri Sarawak, Japri Bujang Masli kemari.

Ba pekara nya, iya madah ke pangku pengawa Pustaka Negeri Sarawak nyadi palan penerang enggau malin ungkup komuniti chukup relevan nipak ke pangku pengawa dipejalai UKAS.

“Penemuai basa nya dikena berandauka kerejasama strategik ti ulih dipejalai kitai begulai enggau Pustaka Negeri Sarawak.

“Pustaka Negeri Sarawak bisi mayuh aktiviti ti ulih dikunsi begulai kelebih agi tanggungpengawa ngerembaika polisi enggau inisiatif perintah Sarawak,” ku iya.

Dikena ngepunka pekara nya, Awang Putrayusrie mai Pustaka Negeri Sarawak bekerejasama ngatur bemacham aktiviti enggau program ti ngerichah Hari Sarawak 2025.

Entara ti diperambu iya nya ngatur pemandang bekaul tusun sejarah ngenuku Hari Sarawak sereta inisiatif Premier Sarawak enggau Strategi Pemansang Pengudah COVID-19 2030 (PCDS2030).

Ungkup tuju nya, iya merambu pemandang nya diatur di Pustaka Pampang Kuching, Sibu enggau Miri.

Nangkan nya, Japri nerima manah perambu UKAS ngambi Pustaka Negeri Sarawak nyadi bakih strategik lalu sedia bekerejasama nentuka sebarang penerang bekaul polisi enggau inisiatif perintah nengeri datai ngagai rayat ngasi agi.

Ba penemuai diatur urung dua jam nya, Awang Putrayusrie enggau Japri bela bekunsi pangku pengawa kededua agensi nya.

Seduai mega bekunsi buah penemu dikena ngemanah servis enggau ngenataika penerang ngagai mensia mayuh. – EDISI UKAS