SCOTLAND: Sarawak sekali agi nempa nama ba panggau antarabansa pengudah dikangau bekunsi pelin kuing tuju pemansang kuasa beresi kandang menua tu serimbai Kongres Eksport Kuasa (EEC) 2025.

Sapit Menteri Kuasa enggau Pemeruan Rampa Menua Sarawak, Datuk Dr Hazland Abang Hipni lebuh bekunsi pekara nya udah nerang ke pengawa meranak puku besai ba kuasa hidro, pemansut hidrogen enggau infrastruktur kuasa ulih dikena baru ti nyadi pemungkal ngemujur juluk Sarawak nyapai status nadai karbon enggau nyadi hab kuasa beresi serantau.

Berebak enggau nya, iya nengah sebengkah penerang media kena Hari Tiga mai pemeranak puku global enggau bakih teknologi nyerungkai sereta nyukung projek kuasa meruan di Sarawak kelai kandang menua tu sedia nyungkak pemansang enggau inovasyen.

Nengah inisiatif tu, iya nyemetak madah ke Sarawak deka terus ransing bejalaika pengawa nentuka rampa menua di kandang menua tu teus meruan seraya nyapai visyen nyadi chunto ba pemansang kuasa ulih dikena baru di selampur Asia Tenggara.

Sama datai, Sapit Sekretari Perintah Sarawak (Perambu Ekonomi enggau Pemansang), Dato Sri Dr Muhammad Abdullah Zaidel; Sekretari Pekara Wang Sarawak, Dato Sri Dr Wan Lizozman Wan Omar; Datuk Bandar Dewan Bandaraya Kuching Utara (DBKU), Dato Hilmy Othman; sereta deligit Sarawak ke bukai. -EDISI UKAS