KUCHING: Lions Clubs International District 308-A2 Leo Forum 2025 nya pelasar besai nempa rebak biak ti andal, besemekih enggau ngembuan semangat volunteer.

Menteri Nembiak, Lumba enggau Pemansang Orang Dagang Sarawak, Dato Sri Abdul Karim Rahman Hamzah madah, bala nembiak ti ngambi bagi ba program diatur Lions Club nyadi pengawa meranak puku tumu nempa tuai ti ngembuan penyedar sivik.

“Tu siti pelasar pemadu manah nempa pengandal diri ba nembiak sereta narak semangat volunteer kenyau ari biak,” ku iya.

Iya madah munyi nya maya dirandau pengudah bejadi forum nya di Raia Hotel and Convention Centre, Kuching kena Hari Empat.

Ku Dato Sri Abdul Karim, semangat volunteer ti ditarak kenyau ari renggat sekula ulih nempa rebak ti siru enggau sedia mantu mensia mayuh.

“Pengudah semangat tu ditarak kenyau ari sida agi sekula, tu deka nyaup nempa pemereti ati ti siru ke komuniti. Tu mih pemesai reti enggau semangat ti dipeda ditegika Lions Club dan Leo Club,” ku iya agi.

Forum ti dipasuk 351 deligit ari 36 Kelab Leo ari Sarawak enggau Sabah tu diatur belabuh ari kemari nyentuk 7 June 2025. – EDISI UKAS