PULAU BRUIT: Sapit Menteri di Opis Premier Sarawak (Pekara Korporat, Pemadah enggau UKAS), Datuk Abdullah Saidol mantaika pengirau ati pasal sekeda projek di Semop ti laun dipejalai.

Ku iya, sekeda projek nengah Program Transfomasyen Menua Pesisir (RTP) ti udah dikemendar kenyau ari ujung taun 2023 apin nunjukka kelai dipejalai nyentuk diatu ari agensi pengatur.

Ku iya, pengelaun tu ngasuh peranak genturung pendiau enggau rumah panjai irau laban ngandalka perengkaguna pemun nya.

“Pekara tu ngasa enggau ngirau ke ati peranak nyengkaum peranak rumah panjai laban projek perengkaguna pemun mit enggau jelan beungkus entara RM250,000 nyentuk RM450,000 tu diguna peranak dikena ngemuntang aktiviti sida besehari-sehari,” terang iya.

Iya madah munyi nya maya dirandau pengudah Pengawa Nyuaka Dagin Chapi Serimbai Hari Raya Aidil Adha 1446H ti diatur seretai ba Balai Komuniti Kampung Semop enggau Balai Komuniti Kampung Tekajong kena Hari Empat.

Ku iya, mayuh projek ti dipejalai mungkur ngaga baru tauka nyeleti jalai dalam genturung pendiau tauka nuju rumah panjai.

Ku iya, Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg empu udah nyemetak madah ba Aum Pre-Council sebedau Aum Kunsil Nengeri (DUN) ngambi semua pengari rayat Gabungan Parti Sarawak (GPS) regas agi gawaka rayat nentuka projek ti dipejalai sida tembu nitih taga asal.

“Sedar ke pengiruh raban agensi pengatur enggau tating kereja ti nambah, aku ngarapka atur kereja tauka mekanisme ngemendar enggau nyiri kunteriktor ungkup projek mit tauka jelan ti mayuh dipejalai ba menua pesisir ulih dikemuntang sereta dirumban lalu agi ngemeratka pengelurus nyengkaum akauntabiliti,” ku iya nyemetak. – EDISI UKAS