SIBURAN: Sarawak beguna mayuh agi lutur veterinar dikena mutar isu berampit enggau penyakit ti nepan jelu ti ulih ngeruga komoditi sereta pengelikun pemakai nengeri tu.

Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom madah, taja jelu tupi di Sarawak nadai dirampit penyakit baka penyakit kaki enggau mulut (FMD), penyampau lutur veterinar agi baruh di nengeri tu ti ulih napi pemar dudi hari.

“Kitai semina bisi 15 veterinar di Sarawak lalu lebuh aku nemuai ke Brazil, sida bisi lebih 4,000 veterinar enti dibanding kitai ditu,” ku iya maya ngatur penemuai seraya gawa ke Kompleks Nyayat Jelu Halal, ditu kena Hari Empat.

Ngenang isu suntuk pengereja profesional ba bidang nya, iya madah ke Perintah Sarawak diatu merambu numbuhka siti institute latih veterinar enggau perubat kediri di Semenggoh.

“Tang, Perintah Sarawak diatu benung merambu numbuhka institut latih veterinar enggau perubat kitai empu di Semenggoh,” terang iya.

Ku iya baru, pengawa tu ukai semina nambahka penyampau tubuh pengereja pakar ba industri nupi jelu tang mega nempa mayuh agi raban profesional lokal ti ulih ngemujur pemansang sektor pemakai enggau komoditi nengeri.

“Ungkup perambu timpuh pandak, kitai nyau ngambi pengereja pengawa ari Indonesia enggau Semenanjung Malaysia ke alai naka diatu agi enda chukup.

“Nya kebuah, tu mih pekara ti meseti dikemansang kitai lalu pengudah kitai mujur nempa abis nadai 50 graduet setaun, aku andal ke kitai deka ba penuduk ti manah agi,” ku iya agi.

Sama datai iya nya Sapit Menteri Industri Pemakai, Komoditi enggau Pemansang Kandang Menua Sarawak, Datuk Martin Ben; Chairman SEDC, Tan Sri Datuk Amar (Dr) Abdul Aziz Dato Husain; Menijar Besai SEDC, Datu Abdul Hadi Datuk Abdul Kadir; sereta temuai dipebasa bukai.— EDISI UKAS