KUCHING: Bisi 13 pengari Sarawak nyengkaum atlit para, jurulatih enggau pegawai sukung deka ngulu program German-Sarawak Special Athlete Sportsman ti diatur di Berlin, Jerman, belabuh ari 16 ngagai 25 June tu.

Ku Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah, pengawa ngambi bagi nya siti peluang kolaborasyen antarabansa nyengkaum sesi latih, pekit sereta taklimat teknikal begulai enggau pakar Paralimpik Jerman.

Deligit betuai ke Presiden Gerempung Lumba enggau Rekreasyen Orang Timpang Pendiau Nengeri Sarawak (PESRON), Matthew Chin Hiong Choi enggau mega digulu atlit baka Richard Ganie James Sigan, pemenang midul emas Para Sukma 2018, 2022 enggau 2024 sereta Nur Farhani Kudus, nembiak UiTM ti bulih midul engkeraju di IPC Grand Prix India, empai lama.

“Entara tokoh ti deka ditemu sida iya nya Ralph Paulo, Tuai Paralimpik Brandenburg, ti udah nyaup atlit Jerman bulih lebih 20 midul emas ba renggat antarabansa nyengkaum Paralimpik Rio, Tokyo dan Paris,” ku Dato Sri Fatimah ba aum pemberita di Baitul Makmur II kena Hari Empat.

Ku iya, program nya mega deka ngaul sesi ngembing begulai enggau pakar pemakai, psikologi lumba sereta penemuai ngagai fasiliti latih betikas dunya di Jerman.

“Kitai ngarapka semua penemu enggau peneleba ari penemuai tu deka dikemanah manah ngambi ngemanah penyulut atlit para Sarawak nuju pemujur besai ba renggat Asia enggau dunya,” ku iya. – EDISI UKAS