SONG: Bisi 46 Tuai Raban Bansa enggau Tuai Komuniti (KMKK) nerima setipikit dichiri baru enggau nampung pengawa ba Pengawa Nyuaka Notis enggau Setipikit Nyiri Tuai Raban Bansa enggau Tuai Komuniti (KMKK) Pelilih Song ti diatur di Bilik Aum Opis Pelilih Song kena Hari Empat.

Ba pengawa nya, bisi 34 Tuai Raban Bansa (KK) nerima setipikit nampung pengawa seraya lapan ex-KK diberi surat ngenang jasa sida sebedau tu.

Pengawa nyuaka setipikit nya udah dipenyadi Menteri Kereja Raya, Dato Sri Alexander Nanta Linggi.

Maya bejaku, iya ngelalau semua tuai ti baru dichiri tauka ti disambung servis bejalaika tanggungpengawa enggau ransing sereta penuh integriti.

“Ungkup KMKK ti baru dichiri, kita udah dipilih rayat kita empu laban diasai ulih ngetuai enggau bejalaika tanggungpengawa nyadi siku tuai.

“Nya kebuah, aku ngarapka kita bekerejasama enggau agensi perintah enggau pengari rayat dikena nyamin pemansang genturung pendiau kita,” ku iya.

Ba pengawa sebaka, Kaban Parlimen Kapit nya enggau Kaban Kunsil Nengeri (ADUN) Katibas, Lidam Assan bela ngagihka belanja RM30,000 ngagai Gerempung Penghulu enggau Tuai Rumah Pelilih Song kelai sukung ngagai tanggungpengawa enggau aktiviti gerempung nya.

Pengawa nyuaka siti perau panjai ngena injin 30hp mega dipejalai Raban Bomba enggau Penyah Penusah Song dikena negapka logistik raban nya mutar penusah ngenyit ba sitak menua ulu.

Sama datai, Pegawai Opis Pelilih Song, Harry Bruce Edwin sereta KMKK Pelilih Song. -EDISI UKAS