SIBURAN: Perintah Sarawak netapka selinting mansutka 60,000 iku chapi manggai taun 2030 nyadi inisiatif nambahka Tikas Ngidupka Diri (SSL) kandang menua tu enggau nyendiaka rentayan bekal dagin ti chukup enggau meruan.

Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom madah, selinting nya ukai semina simbolik tang disukung bemacham pengawa meranak puku strategik nyengkaum ladang nupi ba menua tu enggau menua luar, palan feedlot sereta inisiatif integrasyen betanam betupi begulai pemekuh industri lokal.

“Selinting kitai iya nya abis nadai mansutka 60,000 iku chapi manggai 2030, begulai enggau urung 25 peratus ari SSL kitai lalu diatu kitai mansang nuju jalai ti betul.

“Kitai bisi ladang di Rosewood, Australia Utara enggau kitai mega bisi ‘feedlot’ di Karambungan sereta sekeda projek betanam betupi integrasyen begulai ladang sawit ke alai Kaunsil Pemansang enggau Pengintu Tanah Sarawak (SALCRA) mega benung ngemansang pengawa nupi jelu lalu diatu kitai bisi 3,500 iku jelu,” ku iya.

Iya madah munyi nya maya dirandau pemberita pengudah ngabas Kompleks Nyayat Jelu Halal, kena Hari Empat.

Ku iya, SSL Sarawak diatu udah nambah ari 13 ngagai 16 peratus, siti pekara nyata pasal inisiatif timpuh panjai berengkah mansutka asil.

Tang, dikena terus maju, iya nyemetak madah ke pemesai guna nempa rentayan bekal ti genap, nyerangkung pemansut huluan, proses hiliran enggau akses makit.

“Kebuah kitai napi penanggul ba pemansang sektor betanam betupi laban kitai nadai rentayan bekal ti genap – reti iya, kitai minta orang betanam, sida deka ngereja.

“Tang, penanggul nyadi ba makit enggau sukut bukai ti bekaul,” terang iya.

Nengah kerejasama, Dato Sri Dr Stephen Rundi mega madah, Sarawak deka mansutka keju mozzarella lokal ujung taun ke alai kededua produk tu ukai semina nangkup peminta tang mega diselinting ungkup makit eksport.

Bekaul bekal chapi nyerumba Hari Raya Korban ujung minggu tu, iya meri jamin bekal chukup naka diatu.

Sama datai, Sapit Menteri Industri Pemakai, Komoditi enggau Pemansang Kandang Menua Sarawak, Datuk Martin Ben; Chairman SEDC, Tan Sri Datuk Amar (Dr) Abdul Aziz Dato Husain; Menijar Besai SEDC, Datu Abdul Hadi Datuk Abdul Kadir; sereta temuai dipebasa bukai. – EDISI UKAS