KANOWIT: Siti inisiatif nanam sawit benung diperambu dikena mantu peranak ti bisi tanah kediri.

Kaban Kunsil Nengeri (ADUN) Ngemah, Anyi Jana madah, pengawa betanamka sawit tu deka dipejalai nengah saup ari raban Mid Rajang Regional Development Agency (MiRRDA).

“Genap penyereta ti bisi ati, sida dikemendar nanam sawit pemesai tiga ngagai lima hektar siku,” ku iya maya bejadi Pengerami Tuai Begulai Enggau Rayat enggau Bejadi Projek Entepan Entukar Rumah Julin, Nanga Ngungun kena Hari Tiga.

Anyi mega ngemeratka pemesai guna ransing agi ngatur genturung pendiau ba pemansang sitak Skim Pengentap Baru (SPS) Nanga Ngungun.

Ba pekara tu, iya ngelalau Tuai Rumah ransing agi sereta semampai bekerejasama rat enggau agensi perintah kelebih agi Opis Pelilih.

“Penghulu Pree Minggat, siku pinchin perintah bisi peneleba enggau penau ngetuai pelin pemansang ungkup sitak SPS Nanga Ngungun," terang iya.

Nangkan nya, Projek Entepan Entukar Rumah Julin mega dipenyadi ba pengerami nya ngena agih belanja RM120,000 nengah projek Program Transformasyen Menua Pesisir (RTP) DUN Ngemah.

Kelai sukung ngagai program komuniti, iya mega ngemendar geran Projek Mit Pemansang Menua Pesisir (MRP) RM5,000 ngagai Gerempung Indu Komiti Pemansang enggau Pengelikun Genturung Pendiau (JKKK) Rumah Julin dikena ngatur aktiviti ninting taun sida. – EDISI UKAS