BINTANGOR: Parti Sa’ati Rayat Sarawak (SUPP) Pampang Bintangor ngerami genap taun ke-66 ba sebengkah pengawa jelan iya tang besai reti di Opis SUPP Bintangor kena Hari Tiga.

Pengawa nya udah digulu Kaban Kunsil Nengeri (ADUN) Meradong ti mega Chairman SUPP Pampang Bintangor, Datuk Ding Kuong Hiing enggau bini, Datin Kueh Nai Fun, begulai enggau bala tuai parti nyengkaum Sapit Chairman Chieng Boung Ong, Sekretari Lau Sie Hing, Tukang Wang Lee Ngin Soon, Tuai Raban Indu Cr Chieng Ming Kiong, Tuai Raban Nembiak Ley Chee Hua sereta kaban indu enggau nembiak parti.

Maya bejaku, Datuk Ding meri terima kasih ke pengeransing enggau kerejasama rat ari semua kaban parti ti terus ransing napi isu enggau nyukung agenda pemansang sitak nya.

“Pengering parti bepanggai ngagai penyerakup renggat baruh enggau pengeransing semua renggat betati ke peminta komuniti,” ku iya.

Iya mega bekunsi pejalai projek pemansang ti benung enggau deka dipejalai ba Pelilih Meradong nyengkaum ngaga pegung nyemerai, tebing sungai, jematan Kampung Muhibah–Kampung Rancak, jalai baru Janting ke Sungai Tulai, Dewan Sentral baru, taman rekreasyen Bintangor, palan hemodialisis di Tulai sereta nyeleti sambung batang paip ai di Pasar Bintangor enggau Sungai Mador.

Dikena mekuh rentayan tuai renggat baruh, perambu nambahka Tuai Raban Bansa enggau Tuai Komuniti ba sekeda endur mega udah dibantai ngagai Perintah Sarawak ngambi ngemuntang pengawa meri servis ngagai rayat, ku Datuk Ding.

Ku iya agi, program ngaul komuniti mega deka ditampung nengah Raban Indu enggau Raban Nembiak SUPP Pampang Bintangor nyengkaum Belanda Hari Sarawak enggau pekit nyura nembiak mit serimbai Hari Kebangsaan 2025.

Pia mega, ku iya, program Mobile Service To U deka dipejalai ninting bulan di rumah panjai enggau ngelingi pasar Bintangor dikena ngenyemakka diri enggau komuniti lalu ngenatai penerang sereta servis bantu terus. – EDISI UKAS