KAPIT: Sapit Menteri Digital ti mega Kaban Parlimen Hulu Rajang, Datuk Wilson Ugak Kumbong ngatur Pengerami Ngelalu Pengabang Gawai Dayak 2025 ba rumah iya, ditu kena Hari Satu.

Pengerami ti richah diatur nya nerima penatai peranak lokal nyengkaum kaban belayan enggau bala bakih ari serap komuniti ba sitak Parlimen Hulu Rajang.

Datuk Wilson madah ke diri chukup gaga laban pengerami nya lanchar ti ukai semina ngerami Gawai tang mega lambang bebasa ke adat, budaya enggau pesaka asal komuniti Dayak.

“Gawai ukai semina pengerami, tang nyeremin semangat begulai enggau penyerakup ti meseti terus ditarak ngagai genap rebak,” ku iya.

Iya mega meri terima kasih ngagai semua ti datai ngerichah pengerami lalu besampika kaul penyerakup entara komuniti terus teguh. – EDISI UKAS