KUCHING: Semangat ditegi Parti Sa’ati Rayat Sarawak (SUPP) ti diatu manggai 66 taun terus teguh dalam landskap politik nengeri tu, ku Kaban Kunsil Nengeri (ADUN) Batu Kitang, Dato Lo Khere Chiang.
Ku iya, pengawa ngintu genap taun parti nya ukai semina ngenang sejarah penumbuh parti pemadu tuai di Sarawak tang mega nyadi lambang solidariti enggau kuing tuju pemansang ti meruan agi ungkup nengeri tu.
“Nya kebuah, kitai begempuru ditu ngambi nunjukka solidariti kitai dikena ngingatka pengawa ti dulu enggau nempa pemansang kitai begulai nyadi siti tim dalam Gabungan Parti Sarawak (GPS),” ku iya maya dirandau pengudah pengawa nikika tambai serimbai genap taun ke-66 SUPP di Indu Opis SUPP, Jalai Tan Sri Ong Kee Hui, kena Hari Tiga.
Sapit Tuai Sekretari Besai SUPP nya nyemetak madah, reti sejarah patut dikenang laban nya nyeremin penatai asal sereta pejalai panjai ti ditujah parti enggau nengeri Sarawak nya empu.
"SUPP tu parti politik pemadu tuai di Sarawak lalu lebuh kitai nyebut parti politik pemadu tuai, nya parti ti kaya enggau budaya sereta sejarah.
“Ari pun, kami negika kemerdekaan ungkup Sarawak. Tuai SUPP negika kemerdekaan ungkup Sarawak lalu nyentuk sehari tu, kami tetemuka subjek nya agi bisi. Kami deka nyaga Sarawak. Kami deka nyadi pemansut asal,” ku iya.
Dato Lo ti mega Chairman SUPP Pampang Batu Kitang mega madah ke pengandal iya ngagai bala tuai nengeri enggau parti ti dikemudi Presiden SUPP, Datuk Amar Profesor Dr Sim Kui Hian ke mega tuai ti bepenau dikena nyukung aspirasyen rayat Sarawak.
“Kitai ulih meda nengeri tu nuju pemansang ti betul lebuh ngemansang pelajar lalu meransang nembiak kitai nampung pelajar laban nya pekara ti chukup beguna.
“SUPP ti diulu ke Datuk Amar Dr Sim, kami mansang begulai nentuka Sarawak deka meruan teguh enggau mansang tegap agi dudi hari,” ku iya nyemetak.
Iya mega madah kediri temegah meda raban nembiak ngaul diri dalam SUPP sambil madah ke nya siti timbal positif ba pengawa ti ditegi parti.
“Kitai meseti nyeridi rebak biak pasal pemesai guna SUPP enggau GPS negika hak Sarawak. Tu ukai pasal politik tang pasal pemansang nengeri tu,” ku iya baru. – EDISI UKAS
