MIRI: Serimbai pengerami Gawai Dayak 2025, dua tuai nengeri iya nya Menteri Pengangkut Sarawak ti mega ADUN Senadin, Dato Sri Lee Kim Shin enggau Datuk Bandar Bandaraya Miri ti mega ADUN Pujut, Adam Yii Siew Sang udah ngulu pengerami ngelalu pengabang Chairperson Gerempung Indu Orang Ulu Miri (PWOUM), Kijan Toynbee, di rumah iya di Pujut 3B kena Hari Satu.

Pejalai ngabang nya belabuh pukul 9 pagi ari Dato Sri Lee ditangkan penatai Adam Yii urung pukul 11 pagi.

Dato Sri Lee lebuh dirandau pemberita meri Selamat Ngintu Gawai Dayak ngagai semua lalu madah ke diri temegah meda tradisyen ti dikemeran komuniti Sarawak.

“Kitai di Sarawak ngembuan tradisyen ti chukup nyelai ke alai pengerami ngelalu pengabang ti nyadi pelasar ngempung rayat pupu bansa enggau jalai pengarap.

"Semangat Segulai Sejalai tu mih pengering nengeri kitai," ku iya.

Iya mega muji polisi perintah nengeri ti inklusif dikena ngaul semua komuniti nadai ngira penatai nyengkaum nengah penumbuh unit khas dikena nyukung bemacham jalai pengarap di Sarawak.

Penatai kededua tuai tu ngerichahka agi pengerami ngelalu pengabang seraya ngerapit kaul rat entara tuai enggau komuniti lokal ti datai ngintu Gawai. -EDISI UKAS