MIRI: Malam Main Asal serimbai Pengerami Lumba enggau Main Asal KEBANA 2025 mujur ngempuru beratus komuniti Kenyah Badeng ari selampur Sarawak ba siti pengerami ti richah enggau semangat beserakup di Institut Pengelandik Nembiak Menua (IKBN) Miri, kena Hari Minggu.

Pengerami nya dipenyadi Datuk Bandar Bandaraya Miri ti mega Kaban Kunsil Nengeri (ADUN) Pujut, Adam Yii Siew Sang ti datai ngari ke Sapit Menteri Dagang Temuai, Industri Kreatif enggau Seni Pemerindang Sarawak, Datuk Sebastian Ting Chiew Yew.

Nengah teks jaku ti dibacha Adam Yii, Datuk Sebastian meri terima kasih ngagai Gerempung Kenyah Badeng Sarawak laban ngatur pengerami ninting taun ti ukai semina nyaga pesaka budaya tang mega negap semangat begulai entara komuniti.

“KEBANA tu lambang pemereti ati komuniti Kenyah Badeng ti udah mujur ngempung komuniti ari selampur nengeri nyengkaum Miri, Sibu, Kuching enggau Bintulu.

"Pengerami tu mega nyeremin pemansang modal mensia nengah lumba, budaya enggau jalai pengarap," ku iya.

Iya madah, KEBANA ti ditumbuh kena 12 Januari 2004 dipeda nyadi bakih strategik perintah ngambi negap komuniti menua pesisir nengah inisiatif komuniti.

Iya mega ngelalau rebak biak terus ngaul diri ba gerempung dikena nampung legasi budaya enggau identiti Kenyah Badeng.

Malam main asal mega richah enggau bemacham pemerindang asal Kenyah Badeng enggau nerima sambut ti chukup manah ari mensia mayuh.-EDISI UKAS