BINTANGOR: Serimbai Pengerami Gawai Dayak 2025, Kaban Kunsil Nengeri (ADUN) Meradong, Datuk Ding Kuong Hiing, udah ngabang ngagai 17 rumah panjai ti richah diatur di sitak Meradong, kena Hari Minggu.

Entara sitak rumah panjai ti dilawa nyengkaum Tanah Putih, Sungai Petai, Skim B, Sungai Baron, Jalan KJD, Ulu Binatang enggau Sungai Janting, Bintangor.

Penemuai nya mega richah lebuh Datuk Ding belagu sereta ngulu aktiviti poco-poco begulai enggau peranak rumah panjai ngerichahka agi pengerami Gawai Dayak.

Datuk Ding mega gaga laban mayuh peranak udah pulai ke menua ngambi ngintu Gawai begulai enggau diri sebilik.

"Pengerami Gawai Dayak taun tu chukup richah enggau ulih diasai ke serap komuniti, nadai ngira biak tauka tuai.

"Tu nunjukka semangat begulai ti teguh entara komuniti Dayak," ku iya.

Iya mega ngena peluang nya mendingka bemacham peminta enggau perambu ari Tuai Rumah sereta peranak sepanjai penemuai nya.

Taja pen richah, isu pengelantang enggau peminta peranak tetap diberi perati.

"Sebarang peminta ari peranak tauka Tuai Rumah dibantai nengah surat ngagai Palan Servis DUN Meradong ungkup atur bukai," ku iya. -EDISI UKAS