SARIKEI: Pengawa Ngabang Gawai Dayak 2025 ti richah diatur di empat rumah panjai ba sitak Repok udah nyadi pelasar besai ungkup komuniti lokal ngenataika sada sereta peminta sida terus ngagai pengari rayat.

Nya kebuah, Sapit Menteri Pengeraja Asal enggau Pemeruan Rampa Menua, Dato Sri Huang Tiong Sii meri besai terima kasih ngagai peranak rumah panjai laban udah ngangau ke iya sereta chukup kemerah.

"Tu mega peluang ngerapit kaul entara tuai enggau komuniti sambil richah ngintu Gawai Dayak," ku iya kena Hari Enam.

Kaban Parlimen Sarikei mega madah diri gaga meda sukung rat ari rayat ba sitak Sarikei.

“Sukung tu nyadi peransang ngambi aku terus nyadaka isu enggau peminta rayat ba renggat Parlimen enggau Kunsil Nengeri," ku iya.

Pengawa Ngabang nya udah diatur ba empat rumah panjai iya nya di Rumah Pitre Ambit, Rumah Clement Ak Asuh, Rumah Anthony Suding enggau Rumah Mawas Timbu. -EDISI UKAS