KUCHING: Pengawa ngenuku Gawai Dayak nyadi pengerami rasmi kenyau ari taun 1965 nya asil pengeransing tuai ti dulu.

Yang di-Pertua Negeri Sarawak, Tun Pehin Sri Dr. Wan Junaidi Tuanku Jaafar madah, nya asil pengeransing tuai ti dulu ti ngangkatka budaya Dayak ngagai tikas ti tinggi.

"Tu ukai semina pengerami ngetau asil padi tang mega nyadi lambang penyerakup, pengelantang enggau semangat begulai pupu bansa di Sarawak.

“Tradisyen ‘ngajat’, ruai sereta beripai nyendiaka diri ngintu pengerami nyeremin penyelai budaya ti meseti terus ditan," ku iya.

Iya madah munyi nya ba pesan khas serimbai pengerami Gawai Dayak 2025 kena Hari Enam.

Tun Pehin Sri Dr. Wan Junaidi mega meri terima kasih ngagai gerempung ukai dikuasa perintah (NGO) ti ransing mantu komuniti kelebih agi ba pelajar, pengelantang, pengerai enggau nyaga budaya komuniti Dayak.

"Nengah pejalai bemacham program baka bantu fasiliti pelajar ngagai nembiak B40, kimpin beperesa pengerai pechuma enggau inisiatif nyagu seni sereta adat asal Dayak, NGO udah nyadi bakih strategik ti beguna amat dikena nempa komuniti ti inklusif enggau lantang," ku iya.

Iya nyemetak madah, pelajar mengkang nyadi pugu nempa rebak ti bepenemu enggau besemekih dikena napi jeman globalisasyen enggau pemansang teknologi pemadu baru.

Ba pekara tu, iya ngenang pengeransing Perintah Sarawak nentuka anak Sarawak kelebih agi ba sitak menua ulu enda kena tinggal ari arus pelajar ti bisi kualiti.

"Bemacham inisiatif udah dipejalai dikena nambah tikas literasyen enggau prestasyen akademik nyengkaum Program intervensyen tumu sereta nyendiaka palan ngembing belajar.

"Nya alai, aku ngarapka apai indai terus ngemeratka pemesai guna pelajar nentuka anak nyapai pemujur ungkup pengidup ti menyana agi," ku iya. -EDISI UKAS