KUCHING: Pengerami Gawai Dayak ukai semina kelai musin ngetau abis tang jauh besai agi reti nyadi lambang peneguh, pengeransing enggau pengering komuniti Dayak ti udah ditampung ari kelia.

Sapit Premier Sarawak, Datuk Amar Awang Tengah Ali Hasan nengah pesan khas serimbai pengerami nya kena Hari Enam madah ke Gawai nyadi siti manifestasyen budaya ti nyeremin semangat komuniti Dayak ti semampai teguh napi pemar pengidup.

“Gawai ukai semina kelai penembu musin ngetau tang mega lambang semangat ransing, pengandal enggau pengering komuniti.

"Tu manifestasyen budaya ti udah ditampung ari kelia lalu meruan nyumbuk ba ati rayat Sarawak, " ku iya.

Ku iya, pengawa ti dibantai nengah pengerami Gawai Dayak baka begulai, negap komuniti enggau ngenang peewkq aki ini kitai kelia nya pugu nempa komuniti ti seati enggau progresif.

Ku iya, semangat tu mih ti ngempung rayat Sarawak taja bebida penatai, jalai pengarap enggau budaya lalu nentuka Gawai ukai semina pengerami komuniti Dayak tang mega siti lambang penyerakup semua rayat Sarawak.

Ngena peluang nya, Datuk Amar Awang Tengah mega ngelalau semua rayat kelebih agi ti pulai ke menua serimbai musin pengerami ngambi semampai bejimat ba pejalai ungkup pengelikun semua.

Ngenang pasal pemansang Sarawak, iya madah ke kandang menua tu ba pelasar tegap nuju status kandang menua maju manggai taun 2030 nengah bemacham inisiatif baka pemansang menua pesisir, nyungkak ekonomi sereta beratka pemeruan enggau kuasa gadung.

"Arapka semangat Gawai Dayak tu ulih negap penyerakup pupu bansa di Sarawak lalu kitai terus maju, ekonomi terus tegap enggau meruan lantang," ku iya agi. -EDISI UKAS