KUCHING: Raban nembiak di Sarawak ukai semina penerima pemaik polisi perintah tang mega nyadi penyungkak besai pemansang nengeri nuju pengidup ti menyana agi.
Menteri Nembiak, Lumba enggau Pemansang Orang Dagang Sarawak, Dato Sri Abdul Karim Rahman Hamzah madah, nengah lebih sejuta nembiak beumur entara 15 ngagai 40 taun, Sarawak ngembuan aset modal mensia ari sukut pengereja, kreativiti sereta pengulih tuai dudi hari.
“Karnival tu seraris enggau inisiatif Opis Menteri Nembiak, Lumba enggau Pemansang Orang Dagang Sarawak (MYSED), ti disebut Sarawak Xtive.
“Batang tuju karnival tu dikena nempa rayat Sarawak ti regas, gerai, inklusif enggau bisi tanggungpengawa sosial nipak ke aspirasyen nengeri nempa komuniti ti besemekih manggai 2030,” ku iya.
Iya madah munyi nya maya bejadika Karnival Nembiak Satok XTIVE 2025 ti diatur di Kompleks Sukan Satok @ Padang SLPAS, kena Hari Lima.
Karnival nya diatur Kelab Belia Prihatin Bandar Kuching (KBPBK) nengah sukung MYSED, seraris enggau aspirasyen Sarawak Xtive, program pemansang nembiak ti ngemeratka kerejasama semua ari sukut fizikal, sosial enggau ekonomi.
Dato Sri Abdul Karim mega muji inisiatif meruan karnival nya ti ngemeratka penyebela bemacham sukut pemansang nembiak nengah aktiviti baka Randau Begulai enggau Tuai Sarawak, VR Pechuma, Pekit E-Lumba Mobile Legends (MLBB), Nembiak Satok Got Talent, Lumba Rayat & Pickleball sereta Reruai Bejual Rahmah.
Ku iya, perintah nengeri terus bebendar nyendiaka pelasar pemansang nembiak nengah bemacham inisiatif nyengkaum Sarawak Youth Creative Industry Fund (SYCIF), SYStartUp sereta bemacham inisiatif ba pekara digital enggau e-lumba.
Ku iya, semua inisiatif tu sebagi ari Strategi Pemansang Pengudah COVID-19 (PCDS) 2030 ti meri perati ngagai pemansang modal mensia, inovasyen sereta penyereta inklusif nembiak ba pemansang nengeri.
Nengah sukung meruan perintah enggau kaul nembiak, Sarawak andal ulih nempa rebak biak ti ukai semina dinamik enggau inovatif tang mega bisi tanggungpengawa ngemujur agenda pemansang nengeri manggai 2030. – EDISI UKAS
