KUCHING: Pengawa mutar isu dokumen pengelala diri enggau status peranak nembiak mit di Sarawak terus ditegap Perintah Sarawak enggau Perintah Besai nengah bemacham inisiatif begulai.

Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah ba penemuai gawa ngagai Opis Pengerejister Bansa (JPN) Sarawak nyemetak madah, kerejasama strategik tu beguna amat dikena nyamin hak enggau pengelantang nembiak mit ti napi penusah ketegal nadai status peranak.

“Perintah Sarawak naka ulih enggau sedia bekerejasama enggau Perintah Besai kelebih agi Opis Menteri Dalam Menua enggau JPN dikena mutar isu besai chara berurun enggau berunding ke pengelantang,” ku iya serimbai penemuai gawa nya, kena Hari Lima.

Entara inisiatif besai asil kerejasama tu nyengkaum numbuhka Komiti Khas Status Peranak (JKKSK) renggat negeri ti deka berati ke peminta nengah Perkara 15A Perlembagaan Persekutuan sebedau dibai ngagai renggat ti tinggi agi.

Kenyau ari ditumbuh, JKKSK udah berati ke bepuluh peminta mungkur kategori anak enda diaku, anak ambu enggau anak dijaga.

Pia mega, pengawa bejalaika Program Raban Khas (PPK) ari Opis Premier Sarawak nengah kerejasama JPN Sarawak nunjukka pengeran kededua raban ngerumban peminta dokumen pengelala diri.

Sepanjai taun 2023 nyentuk diatu, lebih 13,000 peminta udah diterima lalu nyau deka setengah ari nya udah dikemendar.

Berebak enggau nya, Perintah Sarawak mega bejalaika polisi tambah enggau ngemendar indikator ‘K’ dipasuk dalam tingki nembiak mit ti nerima status peranak nengah Perkara 15A, nentuka identiti sida diaku seraris enggau status apai indai nyadi pengentap nengeri tu.

Iya nyemetak madah, kolaboratif tu ukai semina ngerumban proses peminta tang mega ngurangka kes nembiak mit ti kena tinggal ketegal nadai dokumen ti patut.

“Tu tanggungpengawa begulai entara Perintah Sarawak enggau Perintah Besai dikena nyamin hak genap anak bulih identiti enggau akses ngagai pelajar sereta pengerai,” ku iya baru.

Penemuai rasmi tu mega disempulang agensi strategik nengeri nyengkaum Opis Luyar Besai Nengeri Sarawak, Unit Pengelikun enggau Penerit Atur Sarawak (UKPS), enggau Unit Atur Pengawa Opis Premier Sarawak. -EDISI UKAS