KUCHING: Orang Gawa Perintah Sarawak dilalau negap budaya kereja ti manah lalu meri perati bejalaika pengawa ti besai empas ba suku kedua taun 2025.

Sekretari Perintah Sarawak, Datuk Amar Mohamad Abu Bakar Marzuki nengah Pesan Ninting Bulan, Mei 2025 meri besai terima kasih ngagai semua orang gawa perintah Sarawak laban meras gawa ngemujur polisi enggau aspirasyen perintah ungkup pengelantang rayat.

“Kitai diatu datai ba suku kedua 2025, renggat ti regas bejalaika pengawa, terus matau sereta bepenau mutar pemar enggau naka pengelengkas sereta ngasi,” ku iya.

Berebak enggau nya, Datuk Amar Mohamad Abu Bakar mega mai semua Tuai Opis berati ke baru pemujur enggau kuing tuju bejalaika agenda strategik sida.

Iya nyemetak madah ke pemesai guna ngaga pemutus bepelasarka data enggau bukti, ngena teknologi sereta inisiatif ti mansutka asil (outcome-based).

“Semina nengah inisiatif tu, kitai ulih nempa Orang Gawa Perintah Sarawak ti regas, besemekih enggau sikar bejalaika pengawa nipak ke aspirasyen Premier Sarawak deka ke nengeri tu maju, progresif enggau inklusif,” ku iya.

Nangkan nya, serimbai pengerami Gawai Dayak kena 1 June tu, Datuk Amar Mohamad Abu Bakar meri Selamat Ngintu Gawai Gayu Guru Gerai Nyamai ngagai semua orang gawa perintah enggau rayat Sarawak ti ngintu pengerami nya.

“Pengerami Gawai Dayak mandangka pengaga, penyerakup enggau pemungkal baru.

“Tu nyeremin pengaya budaya komuniti Dayak sereta semangat begulai ti nyadi pugu pengering nengeri tu,” terang iya.

Kelimpah ari nya, iya mega besampika sida ti pulai ke menua likun datai ba endur ti dituju lalu ngarapka pengerami sekali tu mai besai reti begulai enggau orang ti dikesayau. – EDISI UKAS