PUSA: Pengerami Mantar Gawai Dayak Renggat DUN Beting Maro richah diatur ba Rumah Panjai Munggu Ruan, Muton Undai, kena Hari Empat tu tadi.

Program tu diatur Komiti Pemansang enggau Pengelikun Genturung Pendiau (JKKK) Undai enggau kerejasama Palan Servis DUN Beting Maro, Palan Servis Parlimen Batang Lupar sereta Opis Pelilih Pusa.

Program tu mega richah enggau penatai temuai dipebasa iya nya Kaban Parlimen Batang Lupar, Mohamad Shafizan Kepli enggau Kaban Kunsil Nengeri (ADUN) Beting Maro, Razaili Gapor.

Maya bejaku, Mohamad Shafizan ngemerat pemesai reti penyerakup entara raban bansa di Sarawak ke nyengenda dipeda maya hari besai baka Gawai Dayak.

“Hari Gawai ukai semina diintu rayat bansa Iban, tang mega bela dirami raban bansa Melayu enggau China. Tu ngelai penyerakup tegut ti ditanggam di nengeri tu,” ku iya.

Iya mega madah ke peranak rumah panjai patut ngena manah perengkaguna ti disediaka perintah, nyengkaum ba pekara pemansang enggau pelajar.

Ku iya, pemujur pengawa ngelanchar Jematan Batang Saribas kena 25 Mei tu tadi nempa sejarah ba pelilih Pusa, ke deka nyungkak ekonomi enggau pekara rama peranak menua nya.

“Tu sebagi ari inisiatif Perintah Sarawak ungkup peranak menua pesisir, lalu kitai beterima kasih ngagai Premier Sarawak laban udah ngemujur inisiatif tu,” ku iya baru.

Iya nyemetak madah, pengelikun meseti dikemerat maya pengerami Gawai Dayak tu.

Kelimpah ari nya, ADUN Beting Maro, Razaili Gapor mega meri terima kasih ngagai raban pengatur enggau peranak Rumah Panjai Munggu Ruan ke pemujur ngatur pengerami nya.

“Kitai chukup beterima kasih laban semua aktiviti ulih diatur enggau lantang, mandangka penyerakup reta pemadu besai rayat Sarawak,” ku iya.

Iya mega madah, sukung rayat ngagai iring tuai perintah nengeri besai amat reti nentuka pemansang seruran dikemujur.

“Premier Sarawak siku tuai ti regas bejalaika pengawa enggau bebendar mai pemansang ngagai nengeri tu. Rayat patut majak ke sukung sida ngagai perintah ke udah mandangka pemujur,” ku iya nyemetak.

Kelimpah ari nya, iya mega meransang rayat di Beting Maro ngambi majak ngemansangka sektor betanam betupi ditu, nyengkaum nengah agensi bekaul baka apung, nyiur, enggau mulung ke diatu diberi perati perintah nengeri.

Pengerami lemai nya bela richah enggau bemacham pemerindang budaya enggau pemakai asal serimbai ngintu Gawai Dayak.

Sama datai, Pegawai Pelilih Pusa, Jamain Wahab, SAO Pelilih Mit Debak, Mohammad Khairurani Mohammad Ibrahim, Pemancha Pelilih Pusa, Rosli Uji sereta Tuai Rumah Munggu Ruan, Jabat Gura.-EDISI UKAS