KUCHING: Raban tasah tanah tusur ke nyadi kena 29 Januari pun taun tadi ba Kampung Lereng Bukit, Miri deka dipindah ngagai endur baru.

Sapit Menteri Besai, Datuk Patinggi Dr Ahmad Zahid Hamidi madah, pejalai projek nya deka berengkah pengudah pengerami Gawai Dayak tu lalu deka dipejalai agensi Perintah Sarawak.

"Baka ke nyadi ba 15 buah rumah di Miri ti abis jai, perkara tu mega udah dipesetuju deka dipejalai pengudah ngintu Gawai Dayak laban isu tanah udah diputar.

"Kitai mega udah setuju meri kuasa ngagai agensi perintah nengeri bejalaika projek tu, lalu enda agi begunaka FELCRA ngaga tauka raban MARA bejalai ke pengawa," ku iya.

Datuk Patinggi Dr Ahmad Zahid Hamidi madah munyi nya ba aum media pengudah ngulu Sesi Penerang Pejalai Program Enggau Projek Pemansang Opis Menteri Pemansang Genturung Enggau Kandang Menua (KKDW) ti betuai ke iya ditu, Hari Lima.

Nitih ke penerang, endur baru nya udah dipilih sereta udah ditetap Komiti Pemansang enggau Pengintu Tanah (LCDA) semak sitak genturung Orang Ulu Rurum Kelabit di Miri.

Kelimpah ari nya, Datuk Patinggi Dr Ahmad Zahid ke mega Menteri KKDW mega madah, opis menteri iya majak ransing bejalaika semua projek tejanggal di Sarawak ke dipejalai opis menteri nya.

Ku iya, bisi lima projek bepenanggul nyengkaum isu taba baka permit, ngempu tanah enggau ditekul sambung batang paip sereta gaya hari.

"Aku empu udah minta ngagai Sapit Menteri KKDW, Datuk Rubiah Wang ngambi ngatur sereta ngeripot tiap minggu dikena matau sereta bejalai ke pengawa nya.

"Arap ke mujur, enti sema bisi sebarang penanggul ari opis menteri bukai ti ngaul belanja ke enda ulih diagih tauka digaga, nya deka diputar lengkas.

"Tu besai reti laban rayat di Sarawak meseti dikenulu nipak ke pekara ti patut dikemerat lebih agi ba sitak genturung pendiau enggau menua pesisir di selampur Malaysia. Sarawak mega patut ngasaika utai ke diasai nengeri bukai di Malaysia ini," ku iya.

Datuk Patinggi Dr Ahmad Zahid Hamidi madah, sesi penerang nya mega gerah ari Menteri Besai Dato Seri Anwar Ibrahim berindik ari penemuai gawa sehari iya ke Kuching kena 19 April tu tadi.

Ungkup penerang, di baruh Langgur Pemansang Malaysia Lumpar Ke-12 (RMK-12), Sarawak nerima agih belanja penyampau RM3.2 bilion dikena bejalai ke 403 program enggau projek ti beungkus RM21.73 bilion.

Ari penyampau nya, 178 projek (44.71 peratus) agi ba status ‘Pra-Dipejalai’, nyengkaum 155 projek ti dikemendar ari taun 2021 ngagai 2025.

Bisi 91 projek tauka semak 46 peratus ari projek ba status Pra- Dipejalai disadang nerima Surat Setuju Nerima (SST) abis laun ujung taun 2025.

Sama datai maya sesi penerang nya, Sapit Premier Sarawak, Datuk Amar Profesor Dr Sim Kui Hian, Menteri Utiliti enggau Telekomunikasyen Sarawak, Dato Sri Julaihi Narawi, Sapit Menteri Industri Pemakai, Komoditi enggau Pemansang Kandang Menua Sarawak, Datuk Martin Ben, Sapit Menteri Pemansang Genturung enggau Kandang Menua, Datuk Rubiah Wang, Sapit Sekretari Perintah Sarawak (Administrasyen), Datu Buckland Bangik sereta Raban Tuai Opis Perintah.

Tembu aum media, Datuk Patinggi Dr Zahid Hamidi besembiang di Masjid India ditu sebedau merarau ba Restoran Mahashafi.

Bela nyempulang iya, Dato Sri Julaihi, Datuk Martin Ben, Datuk Rubiah, Sapit Menteri Ba Opis Premier Sarawak (Penyeraris Projek Ungkup Agensi Pemansang Kandang Menua, Dewan Bandaraya Kuching Utara enggau Pekara Islam) Datuk Dr Abdul Rahman Junaidi, Datuk Bandar Dewan Bandaraya Kuching Utara Dato Hilmy Othman enggau Yang Dipertua Majlis Islam Sarawak, Datuk Misnu Taha. -EDISI UKAS