KUCHING: Siti dataran ikonik ke digelar Dataran Bujang Berani dilanggur deka digaga di Kapit dikena masa komuniti Dayak ba sukut pengelikun enggau pemansang menua.

Menteri Kereja Raya, Dato Sri Alexander Nanta Linggi madah, palan dilanggur ngaga dataran nya semak Kubu Silvia, siti palan sejarah ti bisi pengulih nyadi landskap ikonik serimbai ngingat 100 taun pengawa bebaik di Kapit sereta pengawa bebendar ngelaban musuh.

“Dataran Bujang Berani nya siti perambu dini alai ke bisi di Kapit, semak enggau Kubu Silvia, lalu nya mega udah dipadah nyadi siti kelai ikonik landskap,” ku iya.

Iya madah munyi nya maya aum media pengudah ngelanchar bup “Commemorating A Century Of Kapit Peacekeeping (1924–2024)” ditu, Hari Lima.

Ku Kaban Parlimen Kapit nya, langgur ngaga dataran nya ukai semina ngembuan tuju dikena ngingat pengawa bebaik ti nyadi kelia, tang mega dikena ngaku komuniti bansa Dayak ke udah lama bebendar ngetanka menua, nyengkaum sebedau Malaysia ditumbuh.

“Ba bagi menua Kapit tu, ti mega menua ulu ke alai bansa Dayak, nadai ngira raban bansa, semua Dayak kala nyaup pemansang menua ke ditumbuh kitai nyadi Malaysia.

"Sebedau Malaysia pen udah berambunka nyawa nyadi soldadu pengelikun di Malaya maya Malaya Emergency nyadi Sarawak Rangers lalu mega nyadi Malaysian Rangers,” ku iya.

Iya madah, Dataran Bujang Berani mega dipeda bisi pengulih nyadi palan malin sejarah sereta lambang semangat penyerakup rebak dudi hari.

Bejaku senentang bup “Commemorating A Century of Kapit Peacekeeping (1924–2024)”, iya nerang, bup nya baka dokumen besai ti ngempuru penerang sejarah, keretas kereja, jurai jaku, sereta gambar bekaul pengaaa bebaik ti nyadi entara pupu bansa ba kandang menua pesisir di ulu Kapit 100 taun kelia.

Ku iya, bup nya ukai semina dikena ngingatka hari besejarah ti udah nyadi entara komuniti di Sarawak enggau garis adan menua Indonesia, tang mega nyadi malin beguna ungkup nembiak baru dikena mereti ke pugu pengelantang ke dikembuan kitai kemaya hari tu.-EDISI UKAS