KUCHING: Jasa enggau pengeransing semua raban pemberita enda ngira ke gawa ba luar tauka ba dalam opis patut dikenang.

Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol madah, tanggungpengawa raban pemberita ngenataika penerang ungkup penemu rayat baka pengawa raban terabai menua enggau pengajar.

Ku iya, maya dunya benung napi pemar ubah digital ti ngeruga bemacham aspek pengidup mensia, nya mega ngubah landskap media enggau penatai pelasar media rama ke nyadi pelasar baru alai ngenataika penerang.

"Dunya sehari tu benung napi jeman digital ti ngubah macham aspek pengidup nyengkaum landskap media, enggau penatai media rama sereta influencer," ku iya lebuh ditanya senentang tanggungpengawa pemberita serimbai Hari Pemberita Nasional sehari tu.

Datuk Abdullah nyemetak madah, integriti ke mayuh agi pemberita ti ke bendar lurus ngenataika berita majak pedis.

Ku iya nerang, nya ketegal lebuh media alternatif selalu diguna ungkup tuju enda menuku tauka semina nempa naratif berita ti ngasuh orang asa tauka saru penemu.

"Pandak jaku, tanggungpengawa pemberita ti bepengelandik sereta bepeneleba majak dirami dikena nempa rayat ti bepenemu, berunding positif enggau kompetitif nengah ngenataika berita tauka cherita ti betul sereta konstruktif," ku iya baru.-EDISI UKAS