KUCHING: Sarawak deka nempa sejarah kediri lebuh nyadi tuai rumah dua pekit besai dikuasa Gerempung Skuasy Asia (ASF) bulan Jun 2025, iya nya Asian Individual Championship enggau Asian Doubles Championship.

Sapit Menteri Nembiak, Lumba enggau Pemansang Orang Dagang Sarawak, Dato Gerald Rentap Jabu madah, bisi 90 pemain ari 18 menua deka ngambi bagi ba kategori individu, lalu lapan menua deka ngambi bagi ba achara ‘double’.

“Kededua pekit tu deka diatur di Palan Skuasy Sarawak, Petra Jaya, lalu Asian Individual Championship diatur berengkah ari 17 ngagai 27 Jun, lalu Asian Doubles Championship deka diatur ari 23 ngagai 26 Jun 2025,” ku iya nerang.

Ku iya, pekit tikas besai tu disadang ngempuru pemain tebilang ari rantau Asia, nyengkaum atlit betikas dunya ke ba penuduk 10 pemain pemadu manah.

Nama besai ke dipelaba bisi ngambi bagi be pekit tu, Satomi Watanabe ari Jepun enggau Sivasangari Subramaniam ari Malaysia, kededua pemain tu diatu entara pemain skuasy elit dunya.

Dato Gerald mega nyemetak madah pengawa ngatur pekit tu ukai semina besai reti ba konteks pemansang lumba, tang mega nyungkak pemansang ekonomi enggau dagang temuai lumba di Sarawak.

“Pekit tu nyaup aspirasyen kitai ke deka nempa Sarawak nyadi hab lumba besai menua. Ba maya ti sama, kitai nyukung juluk ati perintah nengeri ke deka matak lima juta temuai ngagai Sarawak,” ku iya.

Nambah ke jaku iya, Dato Gerald Rentap Jabu madah, pekit tu bela bulih sukung tegut ari Gerempung Raket Skuasy Malaysia (SRAM) enggau Gerempung Raket Skuasy Sarawak (SRAS), kelimpah sukung teknikal ari bakih antarabansa baka Thailand.

Bala pengatur bela madah tikas pemujur atlit ba pekit tu deka nyadi sebagi ari proses pansik ‘ranking’ enggau ‘seeding’ ungkup Lumba Asia di Jepun, lalu nya ngasuh pekit tu signifikan ngagai semua pemain. –EDISI UKAS