KUCHING: Pejalai Projek Jalai Alun Trans Borneo enggau Sabah-Sarawak Link Road (SSLR) lanchar digaga enggau macham pemujur dijapai naka diatu.

Sapit Premier Sarawak, Datuk Amar Douglas Uggah Embas madah, Projek Jalai Alun Trans Borneo ba Bagi Menua Miri diatu ba renggat ngelangkar lalu deka diputus ba suku kedua taun 2025 sereta ditinda ba suku ketiga taun tu.

“Projek ba Bagi Menua Miri disadang ditinda ba suku ketiga taun 2025, lalu projek ba Limbang enggau Lawas deka diberi ba suku keterubah taun 2026,” ku iya nerang.

Iya nerang munyi nya maya nyimpul jaku opis Menteri iya ba Aum Kunsil Nengeri (DUN) Sarawak Ke-19, kena Hari Tiga tu tadi.
Ba projek SSLR, Menteri Infrastruktur enggau Pemansang Penyangkai Kapal Sarawak nya madah renggat keterubah udah 52.27 peratus digaga naka April 2025, lalu disadang tembu ba suku keempat taun dudi.

Nambah ke jaku iya, iya madah SSLR Renggat Kedua, pengawa ngaga semua pakej udah berengkah nyengkaum pengawa nyungkur taba, tanah enggau parit.

“Naka April 2025, projek nya 0.93 peratus mujur digaga lalu disadang tembu ba suku ketiga taun 2029,” ku iya.

Ngenang pekara bukai, iya madah, bisi 121 projek beungkus RM7.92 bilion udah dikemendar ari baruh inisiatif Opis Menteri Pemansang Genturung enggau Kandang Menua (KKDW), nambah ari 107 projek ke diripot sebedau tu.

Ku iya, 15 projek udah tembu, 33 buah projek agi digaga lalu 73 da ba renggat pra-kontrak.

"JKR Sarawak udah meri 17 projek ngagai kontraktor ke udah dipilih lalu pengawa ngaga berengkah ari timpuh November 2024 ngagai April 2025," ku iya.-EDISI UKAS