KUCHING: Perintah Sarawak majak mandangka pengeransing ngenegap pemansang kandang menua tu nengah 500 projek infrastruktur strategik ari baruh Langgur Pemansang Malaysia Lumpar Ke-12 (RMKe-12) enggau agih belanja sepenyampau RM42.24 bilion.
Sapit Premier Sarawak ke mega Menteri Infrastruktur enggau Pemansang Penyangkai Kapal, Datuk Amar Douglas Uggah Embas madah, projek tu dipeda nyadi penyungkak besai pemansang ekonomi lalu ngangkat tikas pengidup rayat, nyengkaum macham sektor baka jalai alun, jematan, begunan, struktur sungai enggau padang bilun.
Nitih ku iya, entara inisiatif besai ti benung dipejalai nyengkaum 301 projek jalai alun beungkus RM28.03 bilion dikena ngenegap rentayan pengangkut darat, 70 jematan beungkus RM5.76 bilion ti deka ngedut takah entara kandang menua pesisir enggau mengeri sereta 104 projek begunan beungkus RM3.68 bilion nyengkaum sekula, klinik enggau perengkaguna mensia mayuh bukai.
Nambah ke jaku iya, iya madah, projek nya nyengkaum 23 struktur sungai beungkus RM4.42 bilion ungkup pengelikun enggau pengelantang rayat pesisir enggau dua padang bilun beungkus RM350.82 juta ti deka nyungkak akses dagang temuai enggau dagang.
"Nyentuk diatu, 218 projek udah mujur tembu, lalu 122 benung digaga. Bisi 160 da agi ba renggat pra-kontrak,"ku iya madah maya nyimpul jaku opis menteri iya ba Aum Kunsil Nengeri (DUN) Sarawak Ke-19, ditu, kena Hari Tiga tu tadi.
Kelimpah ari nya, Datuk Amar Douglas Uggah madah, bisi 15 projek udah tembu lalu 24 projek tambah ke benung digaga ngelai pengeransing ba nentuka tetiap projek dirumban lalu mujur ungkup pengelantang rayat.
Ngenang pekara bukai, iya madah, opis menteri iya nengah JKR Sarawak mega diatu chakah bejalaika 481 projek infrastruktur beungkus RM3.39 bilion.
Ku iya, projek tu dipejalai ari baruh lima agensi pemansang kandang menua, iya nya, Agensi Pemansang Besepadu Kandang Menua Samarahan (IRSDA), Agensi Pemansang Sri Aman (SADA), Agensi Pemansang Bagi Menua Betong (BDDA), Agensi Pemansang Delta Rajang (RADDA) enggau Agensi Penyeraris Pemansang Greater Kuching (GKCDA).
"Ari penyampau semua projek, 110 projek udah tembu menyana, 90 projek benung digaga lalu 281 projek agi ba renggat pra-kontrak," ku iya.
Nerang silik, Datuk Amar Dauglas Uggah madah bisi 41 projek dipelaba tembu ba ujung taun tu, nyengkaum 36 projek jalai alun, tiga jematan enggau dua begunan.
Pejalai pengawa ngaga projek tu, ku iya, ukai semina nyaup perengka guna pemun, tang nyungkak pemansang rama enggau ekonomi menua pesisir.-EDISI UKAS
