KUCHING: Perintah Sarawak ransing ngenegap rentayan pengangkut dikena nentuka jalai penyambung domestik enggau antarabansa lanchar ungkup penguna enggau barang nengah langit, darat, sungai enggau tasik.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, rentayan bekal ti tegap sereta meruan deka ngamatka juluk Sarawak nyadi hab Gerempung Menua Asia Tenggara (ASEAN) ba sektor kuasa ulih dikena baru enggau ekonomi baru.

“Rambau penemuai aku ngagai Toulouse, Perancis pun bulan tu tadi, aku bisi awak ngelawa indu opis ATR enggau Airbus, nyadi sebagi ari pengawa nyikap diri dikena kitai nempa Sarawak nyadi hab aeroangkasa.

“Airbus madah ke sukung tegut ngagai aspirasyen Sarawak, lalu ngelanggur Renyatan Bekunsi Strategik Airbus-Sarawak Kenyalang, nyengkaum enam bidang besai iya nya, kuing nuju pengawa ngeluar kereban api penerebai meruan, pemansang modal mensia, pemansang ekosistem industri, pejalai digital penerebai, projek ngempu Airbus ungkup AirBorneo, enggau operasyen jalai langit,” ku iya.

Iya madah munyi nya maya nyimpul jaku serimbai Aum Kunsil Nengeri (DUN) Sarawak Ke-19, ditu, kena Hari Tiga.

Nambah ke jaku iya, Datuk Patinggi Abang Zohari madah, randau senentang pemansang Aerotropolis di Sarawak bela diatur dikena nentuka Padang Bilun Antarabansa Kuching ulih tetangkupka lebih 15 juta temuai ninting taun.

Kelimpah ari nya, iya madah, penemuai iya ngagai Abu Dhabi meri awak ngagai Sarawak belajar model global di Abu Dhabi, ke alai palan penyangkai kapal besambung enggau nalan antarabansa ba selampur Timur Tengah, Eropah, Afrika, enggau Asia, lalu ngatur perambu nambah jalai penyambung domestik Sarawak enggau manah agi.

“Sempekat Pemereti Ati entara Abu Dhabi Ports Group enggau Bintulu Port Holding Berhad udah disain maya penemuai nya dikena ngemeran kerejasama timpuh panjai ba pemansang enggau ngemanah infrastruktur palan penyangkai kapal, logistik maritim, enggau servis bekaul penyangkai kapal di Palan Penyangkai Kapal Bintulu enggau kandang menua bukai ti sama beguna,” ku iya.

Datuk Patinggi Abang Zohari nyemetak madah projek besai tu nyengkaum pengawa meranakka puku ari sektor luar, ti deka ngelempungka tating belanja Sarawak sereta nyamin pemansang meruan Sarawak ungkup dudi hari.

Singkang strategik tu, dipelaba deka nempa Sarawak nyadi palan besai alai meranakka puku enggau pemansang teknologi gadung di Asia Tenggara, mai pengawa puang enggau ngenegap ekonomi nengeri kemaya hari.-EDISI UKAS