KUCHING: Sarawak ngatur singkang besai dikena nempa diri nyadi hab besai semikonduktor di rantau tu lebuh ‘perang’ chip entara Amerika Syarikat enggau China.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, ‘perang’ chip tu udah meransang pemekuh global baka Intel, TSMC enggau Samsung ngeluarka macham produk sida ngagai Asia Tenggara, India, Eropah enggau Amerika Syarikat.

Ku iya, tu mandangka siti ubah strategik ari pengilang ti meri perati ngagai kandang menua ti entap sereta enda bechiping ari sukut geopolitik.

“Berindik ari nya, penumbuh langkar Strategik Semikonduktor sigi engkeman ba maya iya dikena nempa Sarawak nyadi hab semikonduktor ti berega di rantau tu.

“Visyen kitai nyengala, iya nya dikena nempa Sarawak nyadi pemekuh ti ulih besemekih, puh sereta sedia napi dudi hari ba industri semikonduktor global,” ku iya.

Iya madah munyi nya maya nyimpul jaku ba Aum Kunsil Nengeri (DUN) Sarawak Ke-19, ditu, Hari Tiga.
Nambah ke jaku iya, Datuk Patinggi Abang Zohari madah, langkar pengawa nya deka nyungkak asil meranak puku semikonduktor.

“Lalu tu nambahka Asil Kasar Dalam Menua (KDNK) Sarawak enggau matak pengawa meranakka puku ti mai empas besai, nyungkak inovasyen sereta nempa ekosistem bepelasarka penau ungkup transformasyen industri,” ku iya nerang baru. -EDISI UKAS