KUCHING: Sarawak mutus ati terus seruran tegap enggau nentuka ekonomi enda teruga taja pan napi pemar global ti enda tentu, lebih agi ketegal chukai enggau nurun niki rega minyak dunya.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, chukai ti diletak Amerika Syarikat nyerumba ’Liberation Day’ semina meri empas mit ngagai Sarawak laban menua nya ukai bakih dagang besai kandang menua tu.

Taja pan pia, ku iya, Sarawak tetap ngasai ke empas chukai nya ketegal dagang global charut enggau rega minyak kusut ngagai urung USD65 setong entara April enggau Mei 2025, ti ngeruga asil sektor minyak enggau gas.

"Ari gaya utai ti nyadi, dipelabaka rega minyak deka ba pukul rata USD66 setong ba taun 2025 lalu disadang kusut ngagai USD59 ba taun 2026," ku iya maya nyimpul jurai ba Aum Kunsil Nengeri (DUN) Sarawak Ke-19, ditu, kena Hari Tiga tu tadi.
Premier Sarawak mega andal rega minyak deka belinsur suman setipak enggau peminta global ti nambah.

“Taja pan ekonomi global enda tentu, kitai andal enggau pengepuh Sarawak sereta pelin pemansang ti entap, kandang menua tu deka majak ngerembai mansang,” ku iya nyemetak.

Nambah ke jaku iya, Datuk Patinggi Abang Zohari madah, Sarawak deka majak ngenegap macham inisiatif ekonomi enggau ngerembaika sektor bukai kelimpah minyak enggau gas dikena nentuka ekonomi nengeri ulih beretan napi pemar global.-EDISI UKAS