KUCHING: Perintah Sarawak deka netapka siti rentayan polisi ti komprehensif enggau jauh timpai dikena ngenegapma sektor kuasa sereta nentuka pemeruan kandang menua tu.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, empat polisi besai deka dipejalai dikena ngelangkar kuasa kandang menua dudi hari, iya nya Pelin Tunga Kuing Ekonomi Hidrogen Sarawak, Pelin Atur Pemeruan Rampa Menua, Polisi Idar Kuasa Sarawak enggau Pelin Tunga Kuing Efisyen Kuasa Sarawak.

Ku iya, pejalai polisi tu disadang marit peluang meranak puku penyampau entara RM350 bilion ngagai RM430 bilion, kelimpah nyendia urung 44,000 pengawa puang baru ti mai empas besai ba sektor kuasa ungkup anak Sarawak.

"Pengawa puang tu deka disedia nengah industri baru ti ditumbuh ari pejalai polisi tu.

"Tu ukai semina meri pemaik ngagai pengereja pengawa menua, tang mega nyungkak Dagang Mit enggau Jelan Pemesai (PKS) di Sarawak,” ku iya.

Iya madah munyi nya maya nyimpul jurai Aum Kunsil Nengeri (DUN) Sarawak Ke-19, ditu, kena Hari Tiga tu tadi.

Nambah ke nya, Premier Sarawak madah, inisiatif tu mega bisi pengulih matak pengawa beranakka puku domestik enggau menua luar (FDI) sereta ngenegap pengawa besemekih Sarawak ba renggat serantau enggau antarabansa, seriris enggau aspirasyen kandang menua tu nyadi pemekuh kuasa gadung di Asia Tenggara.-EDISI UKAS