KUCHING: Sarawak diatu ngempu autonomi ba pengawa nyadung gas lalu enda lama agi enda ibuh nitih ke atur baka ba Akta Bekal Gas 1993 enggau subseksyen sekeda Akta Pemansang Petroleum 1974.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madahka perkara tu diputus nengah Penerang Begulai Perintah Besai enggau Perintah Sarawak ke ngaku Ordinan Nyadung Gas (DGO) 2016 nyadi undang-undang dikena di Sarawak.

“Perintah Sarawak deka ngaga langgur dikena nambah pengawa mansutka gas, nentuka industri ngena gas nya enggau chara ti meruan sereta nyaup ngasil kuasa beresi.

"Tu besai reti dikena nempa Sarawak nyadi Hab Gas Beresi Karbon di Kuching,” ku iya maya nyimpul jaku ba Aum Kunsil Nengeri (DUN) Sarawak Ke-19, Hari Tiga.

Iya nerang inisiatif tu bisi pengulih nyaup nyentuk RM120 bilion ngagai Asil Kasar Dalam Menua (KDNK) Sarawak sereta ngadaka 185,000 pengawa puang begaji besai lalu PETROS ke ngesan tanggungpengawa besai nyadi pengatur penatai enggau batang pemekuh infrastruktur gas.-EDISI UKAS