KUCHING: Inisiatif Bantu Barang Diguna (SKAS) ari Perintah Gabungan Parti Sarawak (GPS) udah mujur mai empas besai ngagai pengidup ninting hari rayat nengeri tu kelimpah nyungkak transformasyen digital ba kandang menua pesisir.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, sepenyampau RM464.5 juta udah mujur diagih ngagai 758,483 iku penerima nengah e-wallet, S Pay Global.

“Inisiatif tu ukai semina ngelempungka ungkus belanja idup, tang mega nambah belanja ruang bilik sereta nyungkak ekonomi rayat, lebih agi dagang mit," ku iya maya nyimpul jaku ba Aum Kunsil Nengeri (DUN) Sarawak Ke-19, Hari Tiga.

Nambah ke jaku iya, Datuk Patinggi Abang Zohari madah, inisiatif SKAS ngena S Pay Global mega udah mujur mandang ke tikas penemu rayat bekenaka teknologi digital, lebih agi ba menua pesisir.

Ku iya, komiti genturung, gerempung nembiak enggau biro indu diatu chakah ngena platform digital dikena ngatur program, nabur penerang sereta ngelakuka produk menua nengah online.

“Pengawa ngena S Pay Global ke sebedau tu semina ba kandang mengeri tang diatu majak ngerekai ngagai menua pesisir. Tu ukai semina nambah tikas penemu tang mega neleba sida enggau ekonomi digital,” ku iya madah baru.

Ku iya nerang, pengawa tu seriris enggau juluk ati Perintah Sarawak ke ukai semina nempa rayat landik digital, tang mega nyikap diri enggau ubah teknologi ti deras ba menua tu.-EDISI UKAS