KUCHING: Projek ngaga 16 jematan ari pegai Perintah Gabungan Parti Sarawak (GPS) ti bekenaka belanja RM4.97 bilion disadang mai penguntung besai ngagai rayat sereta meransang penumbuh ekonomi menua tu.

Sapit Premier Sarawak ke mega Menteri Infrastruktur enggau Pemansang Penyangkai Kapal, Datuk Amar Douglas Uggah Embas madah, naka ke diatu lima iti jematan nya udah tembu sereta ulih ditengah.

Ku iya, tu nyengkaum Jematan Marudi, Jematan Nanga Lassa, Jematan Jepak, Jematan Batang Rajang (ke udah digaga nama baru, Jematan Tun Datuk Patinggi Tuanku Haji Bujang) enggau Jematan Batang Saribas 1 ke udah dipenyadi kena 25 Mei tu tadi.

"Projek jematan tu beguna amat lebih agi di menua pesisir," ku iya maya nyimpul jaku ari opis menteri iya ba Aum Kunsil Nengeri (DUN) Sarawak Ke-19, Hari Tiga.

Nambah ke jaku iya Datuk Amar Douglas Uggah madah, penembu jematan nya bela numbuh mayuh agi peluang ba sektor dagang temuai, betanam betupi, dagang lalu deka nyungkak tikas pengidup rayat.

Ku iya, lima iti jematan ke disadang tembu ujung taun tu nyengkaum Jematan Sungai Lingga enggau Jematan Batang Kemena.

Enam iti agi jematan dipelabaka ulih tembu ba taun 2026.-EDISI UKAS