KUCHING: Sarawak majak ke singkang bejadika transformasyen digital alai Perintah Sarawak ngembuan juluk ati nempa digitalisasyen ba 1,106 servis kerja perintah manggai taun 2030.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, Servis Kereja Perintah Sarawak udah nengkebang 55 peratus servis nyadi digital ba taun 2024.

"Pemujur tu kelai pengeransing servis kereja perintah kitai gawa sereta ngadu transformasyen digital kitai lalu ke beguna agi iya nya mulaika penguntung ngagai rayat," ku iya madah.

Iya madah munyi nya maya nyimpul jaku ba Aum Kunsil Nengeri (DUN) Sarawak Ke-19, Hari Tiga.

Iya mega madah, Perintah Sarawak nyaup nyungkak pengelandik orang kereja perintah nyengkaum nganjung pegawai kanan belajar ba Universiti Harvard, Universiti Cambridge, London School of Economics and Political Science (LSE), Universiti Oxford enggau Lee Kuan Yew School of Public Policy.

"Kitai deka meda servis kereja perintah kitai meri servis gawa ke manah lalu nyikap diri bejadika tuju Pelin Pemansang Udah COVID-19 (PCDS) 2030.

"Ari profesionalisme disiplin pegawai kitai, tuju perintah ulih dipenyadi nengah macham projek enggau program ti mai pemaik ngagai rayat," ku iya madah baru. -EDISI UKAS