KUCHING: Perintah Sarawak ngembuan juluk ati nempa kuasa ulih dikena baru nyentuk 70 peratus ari penyampau kuasa champur nengeri manggai taun 2035, nyadi sebagi ari strategi ngenegap pengelikun kuasa enggau nyapai pemansang meruan.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pengeransing nya dirintai nengah Pelin Pemansang Udah COVID-19 (PCDS) 2030 sereta Polisi Idar Kuasa Sarawak (Sarawak Energy Transition Policy, SET-P) ke deka dipadah enda lama agi.

"Pemujur nya deka disaup enggau pemansang penatai kuasa ulih dikena baru nengah model Independent Power Producer (IPP), ti deka ngasil kapasiti nyentuk 10 gigawatt (GW) manggai 2030 lalu 15 GW ba taun 2035," ku iya.

Iya madah munyi nya maya nyimpul jaku ba Aum Kunsil Nengeri (DUN) Sarawak Ke-19, Hari Tiga.

Premier Sarawak bela madah, pengerindu ati sektor peribit ba projek besai baka kuasa solar, biojisim enggau teknologi nukar teda ngagai kuasa majak nambah.

“Dikena nyaup pemujur tu, Perintah Sarawak deka ngemerat pengawa ngemanah sistem nganjung enggau nyadung kuasa sereta ngenegap rentayan bekal kereban mata baka biojisim,” ku iya nerang.-EDISI UKAS