KUCHING: Kereban prototaip nyilih kuasa ngena 'Artificial Intelligence' (AI) keterubah ba dunya, KETEQ.AI, siti pemujur dikemegah anak Sarawak.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, prototaip nya ditengkebang anak Sarawak begulai enggau Sarawak Microelectronics Design (SMD) enggau CSA Catapult ari United Kingdom.

Ku iya, teknologi nya siti pemujur revolusioner mutarka pengilap sistem kuasa.

"Tu deka ngubah chara AI dikena nyadi perengka ti moden agi lebih agi ba pengawa begunaka penyikar, entap sereta ngatur autonomi.

“SMD diatu benung chakah ngaduka KETEQ.AI datai ba tikas komersial lalu nentuka iya nitihka standard.

"Pemujur tu mandangka pengulih Sarawak ti mansang ba industri," ku iya maya nyimpul jaku ba Aum Kunsil Nengeri (DUN) Sarawak Ke-19 ditu, Hari Tiga.

Nambah ke jaku iya, Premier Sarawak madah, penemuai ngagai Cardiff sebedau tu ngelai genap setaun pengawa nyain sempekat pemereti ati (MoU) Semikonduktor Sarawak–UK enggau KETEQ.AI ti mandangka pemujur kerejasama antarabansa ke ulih nengkebang teknologi.

Premier Sarawak madah, sida diatu benung deka belabuh ngerejista Reta Intelek (IP) dikena nyaga inovasyen enggau algoritma proprietari ba KETEQ.AI, ti deka nentuka dijaga undang-undang lalu mai inovasyen nya nyulut ba semikonduktor bepelasarka AI.

"Inisiatif berani tu deka ngangkatka Sarawak nyadi hab semikonduktor tebilang," ku iya madah baru. -EDISI UKAS