KUCHING: Perintah Sarawak majak ransing nyungkak pemansang menua pesisir nengah macham projek infrastruktur di selampur nengeri, nyengkaum Skim Nangkir Genturung Pendiau (SPK), balai mayuh guna enggau opis perintah pelilih menua.
Menteri Pengeraja Asal enggau Pemansang Mengeri, Datuk Amar Awang Tengah Ali Hasan madah, sekeda projek ke benung digaga nyengkaum Pelin Projek Opis Perintah Pelilih Pusa 2035 ke diatu ba renggat kepenudi ngemaru sebedau ulih berengkah ke pengawa.
“Pelin tu udah dikemendar enggau ubah lalu opis menteri diatu ba renggat kepenudi nyikap projek,” ku iya maya nyimpul jaku ari opis menteri iya ba Aum Kunsil Nengeri (DUN) Sarawak Ke-19, Hari Tiga.
Berebak enggau nya, iya mega madahka bisi 22 peminta alai ngaga balai mayuh guna di sitak DUN Opar udah dikemendar Kaunsil Perambu Nengeri (SPA).
Lalu kuasa ngemendar peminta taba ungkup projek Projek Transformasyen Menua Pesisir (RTP) ke nadai bekaul enggau pengawa ngambi pulai tanah diberi ngagai Divisional Siting Board (DSB) ti betuai ke Residen Bagi Menua nya, ku iya madah baru.
Ungkup sitak DUN Kalaka, ku iya, lima Skim Nangkir Genturung Pendiau udah dikemendar digaga nengah Langgur Pemansang Malaysia Lumpar Ke-12 (RMKe-12) iya nya SPK Roban Renggat kedua, SPK Paloh, SPK Ulu Saratok Renggat Kedua, SPK Baru Kupang enggau SPK Pagan.
SPK Roban Renggat kedua enggau SPK Paloh diatu ba renggat ngelangkar, lalu SPK Hulu Saratok Renggat kedua enggau SPK Baru Kupang benung ba proses ngambi tanah.
“Bq SPK Pagan, pengawa ngaga infrastruktur udah berengkah kena 19 September 2024 tang tejanggal kenyau 23 Disember 2024 ketegal perintah kot.
“Perintah udah ngenataika penerang ngagai perintah kot nya sereta agi nganti pemutus kot,” ku iya nerang.
Nambah ke jaku iya, iya madah, Opis Tanah enggau Survei deka ngatur program begulai enggau Kaban Kunsil Nengeri (ADUN) Kalaka sereta Komiti Pemansang enggau Pengelikun Genturung (JKKK) Kampung Pagan dikena mutarka penanggul ke bisi nyadi.
Nerang silik senentang pengawa besilih taba SPK, iya nyemetak madah, pekara nya enda diperansang digaga laban palan ke bisi diatu udah chukup lalu sebarang pengawa nukar palan deka nanggul pemujur ngaga sereta belanja mega deka betambah.
Berindik ari nya, bekaul enggau pekara beempu tanah di Bukit Assek, iya nerang, orang ke beempu tanah agi tau ngenataika peminta ngemaru timpuh pala tanah seagi enda ngelanggar atur tanah ti ditetapka.
Ba pekara bukai, iya madah pengawa nyeleti infrastruktur ba SPK Tellian Tengah Renggat Keterubah benung digaga lalu diatu udah digaga 28.85 peratus ti dipelaba tembu kena 18 September 2026.
“Pengawa ngelangkar SPK Tellian Tengah Renggat kedua tikas keterubah udah diputus lalu pengawa ngaga dilanggur digaga nengah Rolling Plan 1 (RP1) ba RMKe-13.
“Ba SPK Petanak Renggat 2, pengawa ngaga langkar deka di putus ba suku ketiga lalu deka ditender suku keempat taun tu, ” katanya.-EDISI UKAS
