KUCHING: Sarawak ngerikod penyampau asil meranak puku manggai RM17.6 bilion ba taun 2024, mungkur 376 projek ba sektor servis, kilang enggau sektor besai.

Ku Menteri Dagang Antarabansa, Industri enggau Meranak Puku Sarawak, Datuk Amar Awang Tengah Ali Hasan, ari penyampau nya, Direct Domestic Investment (DDI) bulih RM13.5 bilion (76.6%) lalu Foreign Direct Investment (FDI) bulih RM4.1 bilion (23.4%).

“Semua asil meranak puku nya disadang nengkebang lebih 7,800 pengawa puang.

“Sektor servis bulih RM7.6 bilion (43%), ditangkan sektor kilang RM7.5 bilion (42.9%) enggau sektor besai RM2.5 bilion (14.1%).

"Taja pan penyampau asil meranak puku sektor servis enggau kilang nyau ka sebela, sektor kilang lebih agi mayuh nengkebang pengawa puang iya nya bisi 6,430 (81.8%),” ku iya.

Iya madah munyi nya maya nyimpul jaku opis menteri iya ba aum Kunsil Nengeri (DUN) Sarawak Ke-19, Hari Tiga.

Nambah ke jaku iya, Datuk Amar Awang Tengah madah, batang asil meranak puku nyengkaum produk kimia (RM2.9 bilion), elektrik enggau elektronik (RM1.2 bilion), sereta produk ukai logam (RM800 juta).

Ku iya, ba suku keterubah 2025, sektor kilang Sarawak nerima asil meranak puku RM681 juta nengah 24 projek,lalu disadang ngadaka lebih 900 pengawa puang.

“Pemeranak puku majak andal enggau Sarawak laban politik ti entap, penatai pengeraja asal ti mayuh, palan strategik enggau polisi ti ngelaluka pemeranak puku,” ku iya.

Iya mega nerang, lebih 65% ari 115 projek kilang enggau servis bekaul ti dikemendar taun dulu udah mujur digaga.

Iya nyemetak madah, pengawa meranakka puku ba kuasa ulih dikena baru, lebih agi kuasa solar, matak pemeranak puku ari Abu Dhabi, China enggau Singapura ke diatu ngaga pansik pengulih projek.-EDISI UKAS