KUCHING: Sarawak ba penuduk ti engkeman ngulihka gela Sarawak Delta Geopark (SDGp) ari UNESCO Global Geopark Site ba taun 2026.

Sapit Premier Sarawak, Datuk Amar Awang Tengah Ali Hasan madah, Perintah Sarawak ransing ngulihka gela nya.

Ku iya, Sarawak diatu ba renggat kepenudi nyikap diri ditisih UNESCO ti disadang diatur kena 22 ngagai 25 Jun 2025.

“Dikena nentuka semua tu mujur, pengawa mansik pekara nya dulu deka diatur bulan April enggau Mei 2025,” ku iya nerang maya nyimpul jaku opis menteri iya ba Aum Kunsil Neneri (DUN) Sarawak Ke-19, Hari Tiga.

Menteri Pengeraja Asal enggau Pemansang Mengeri nya mega madah, Taman Negara Bako enggau Taman Negara Bukit Lambir udah mujur dichalun nyadi ASEAN Heritage Park (AHP).

“Sepengudah pemujur inskripsi Taman Negara Niah nyadi Palan Pesaka Dunya UNESCO ba taun dulu, dua agi Taman Negara iya nya Taman Negara Bako enggau Bukit Lambir udah dichalun nyadi Palan AHP.

“Pengawa nisih ari ASEAN Centre for Biodiversity (ACB) udah digaga lalu pemutus deka ditemu bulan September tu ila,” ku iya. -EDISI UKAS