KUCHING: Sarawak diatu benung nyikap diri nyadi tuai rumah alai ngatur Lumba Asia Tenggara (SEA) 2027.

Menteri Nembiak, Lumba enggau Pemansang Orang Dagang Sarawak, Dato Sri Abdul Karim Rahman Hamzah madah, opis menteri iya benung ngaga langgur nemuai ngagai Thailand dikena belajar ari sida ke nyadi tuai rumah Lumba SEA Ke-33 taun tu.

“Dikena nentuka pengawa ngatur betikas dunya, opis menteri aku merambu nemuai belajar ngagai Thailand, ke nyadi tuai rumah Lumba SEA ke-33 ba taun 2025.

"Kitai deka merati sereta belajar ngatur program lumba lalu penemu nya deka nyaup kami nengkebang strategi ngatur Lumba SEA taun 2027.
"Kebuah pia laban Lumba SEA ukai semina deka meri peransang ngagai atlit dudi hari tang mega deka mai Kuching nyadi hab besai lumba antarabansa di Asia Tenggara, ngelai singkang berani Sarawak ngagai tikas dunya,” ku iya.

Iya madah munyi nya maya nyimpul jaku opis menteri iya ba Aum Kunsil Nengeri (DUN) Sarawak ditu, Hari Dua.

Senentang pengawa nyikap diri, iya nerang, tu benung digaga ukai semina nyendia perengka guna betikas antarabansa tang mega nyengkaum latih intensif, kerejasama begulai macham agensi enggau nambah tikas sistem logistik ngambi ke program nya ulih diatur mujur.

Ba pekara bukai, ku iya, Sarawak mega nyikap diri ngatur Lumba Borneo ke deka diatur ari 24 ngagai 28 September 2025.

Ku iya nerang, pengawa ngatur baru lumba tu datai ari buah runding Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg ti madahka lumba tu ukai semina program lumba tang pelasar dikena ngenegap kaul rayat Borneo.

Berindik ari nya, iya meri jamin Opis Menteri Nembiak, Lumba enggau Pemansang Orang Dagang enggau Kaunsil Lumba Sarawak (SSC) deka nentuka pemujur pengawa ngatur program nya.

“Lumba Borneo 2025 deka digulu lebih ari seribu atlit enggau pegawai ti deka besemekih ba lumba baka olahraga, nyemerai, boling padang, 'archery' enggau badminton, kelimpah main lama baka nyumpit enggau batak tali,” ku iya nerang. -EDISI UKAS