KUCHING: Kaunsil Adat Sarawak (MAIS) diatu chakah mansik sereta nyikap baru macham kod adat rayat pupu bansa asal ba nengeri tu ngambi ke setipak enggau pemansang sereta guna maya hari tu.

Menteri ba Opis Premier Sarawak, Dato Sri John Sikie Tayai madah, sekeda kod adat ke benung dipansik baru nyengkaum Adat Iban 1993, Adat Bidayuh 1994, Adet Kayan-Kenyah 1994, Adat Lun Bawang 2004 enggau Adat Bisaya 2004.

“Ba Adat Iban, pengawa mansik nyengkaum Adat Berumah Begulai Bebala Mayuh (genturung pendiau), Adat Ruang Bilik (pekara ruang bilik), Adat Tanah (reta) enggau Adat Renchit (macham) deka diperati baru,” ku iya maya nyimpul jaku opis menteri iya ba Aum Kunsil Nengeri (DUN) Ke-19, kena Hari Satu tu tadi.

Nambah ke jaku iya, iya madah, tiga bengkah woksyop udah diatur naka tu dikena berandauka draf mansik adat nya begulai enggau tuai bansa Iban ari selampur Sarawak.

“Woksyop keterubah diatur di Miri iya nya ba Sitak Limbang, Miri enggau Bintulu, lalu woksyop kedua diatur di Sibu ke digulu tuai ari Sibu, Sarikei, Kapit enggau Mukah. Woksyop ketiga diatur di Kuching ke digulu pengari ari Kuching, Samarahan, Serian, Sri Aman enggau Betong.

“Tuju woksyop tu dikena ngenukuka pemetul data ba draf kod adat ti baru sebedau dipejurai ngagai opis tu,” ku iya nerang.
Berindik ari nya, iya madah, sekeda ari adat ti benung dipansik nyengkaum adat ngiru ba bansa Iban ti sebedau tu semina ngemendar ngiru nembiak mit umur 18 taun ke baruh.

“Taja pia, ke bendar iya nyengkaum ngiru orang udah besai enggau chara anumerta nyadika peturun ruang bilik sida, ke ditemu nampung bilik punas.

“Ba adat bansa Bidayuh, pansik adat bekaul pekara ruang bilik, endur diau enggau reta. Randau udah diatur ditu begulai enggau tuai genturung pendiau ari Serian enggau Kuching.

“Sekeda pansik nya nyengkaum Adat Parih Ramban (ngulit), ke nagang enggau orang berami sepemanjai timpuh ngulit. Taja pia, nya tau nibuh dititih enti bisi program udah diperambu tumu agi, tang meseti mayar ukum adat ngagai ruang bilik pemati (Adat Pintahak Omon Bateh),” ku iya.

Kelimpah ari nya, Dato Sri John Sikie nerang, pansik Adet Kayan-Kenyah benung digaga enggau langgur nempa Adet Kayan enggau Adet Kenyah nyadi dua kod dikena masa identiti diri empu.

Ba adat Lun Bawang ku iya, pansik adat nya deka ditipak nyengkaum adat derian, ke sebedau tu kerebau idup meseti diberi, atur nya dilanggur diganti enggau mata duit bepelasarka sempekat kededua ruang bilik.-EDISI UKAS