KUCHING: Komunikasyen korporat enggau strategik Opis Menteri Utiliti enggau Telekomunikasyen Sarawak (MUT) patut ditisih sereta ditegap ngambi ke mujur ngenataika servis ngagai mensia mayuh.

Menteri ba opis menteri tu, Dato Sri Julaihi Narawi madah, udah maya iya chara komunikasyen dikemaru dikena nentuka peragam ba siti pekara ulih diatur manah agi, lebih agi bekaul gas aggregator.

"Aku bekunsi pekara tu ditu, maya kitai mansutka surat tangkan bekaul Ordinan Nyadung Gas (DGO) 2016, lalu surat nya pansut ba media, peragam mensia mayuh enda tentu manah.

"Kitai laun meri nimbal laban ba media rama mayuh betalat ke pekara nya . Aku pechaya bisi enda mereti pekara ke bendar, tang kitai laun ngaga penerang nimbal.

"Taja pia, kitai berenggat nerang nama pekara ke amat ngambika peragam senentang pekara nya enda ke bukai lebih agi sida ke enda tentu nemu tauka nerima penerang ke salah,” ku iya.

Iya madah munyi nya ba Pengerami Masa Serimbai Aum Kunsil Nengeri (DUN) Sarawak Ke-19 di sebuah hotel tebilang ditu, Hari Satu.

Berebak enggau nya, iya minta Sekretari Mendam MUT, Datu Jefri Lias ulih berandau enggau tuai opis enggau agensi perintah berati baru chara komunikasyen ke diatu.

Pekara tu ku iya, nyengkaum ngelangkar strategi komunikasyen ti inklusif sereta ulih diterima semua nyengkaum sida ba menua bukai.

Sama datai maya nya, Sapit Menteri Utiliti (Sarawak Energy Berhad enggau PETROS), Dato Ibrahim Baki sereta Sekretari Mendam MUT, Datu Jefri Lias. -EDISI UKAS