LAWAS: Opis Perintah Lawas ke baru disadang berengkah dibuka Ogos taun tu dikena nyungkak tikas pemanah servis perintah ba kandang menua nya.

Sapit Premier Sarawak, Datuk Amar Awang Tengah Ali Hasan madah, opis nya diatu agi ba renggat kepenudi ngaga ke deka bisi 16 opis enggau agensi perintah.

"Aku udah meri sekeda penemu dikena nyeruri mimit begunan nya lalu nyangka bekenaka timpuh mimit.

"Begunan tu deka bisi 16 opis perintah enggau agensi ke bekaul lalu deka disikap enggau perengkaguna ti chukup manah baka balai, lif, eskalator enggau ke bukai.

"Aku ngarap begunan tu ulih ditembu nitih ke langgur ti udah ditetap,” ku iya madah ba aum media sepengudah ngabas projek nya apin lama tu tadi.

Ku iya, enti begunan nya tembu ke bisi macham opis enggau agensi perintah ba siti begunan ukai semina ngemuntang ke rayat tang mega ulih ngemanah kerejasama entara opis perintah sereta nyamin servis ke efisyen sereta efektif agi.

Datuk Amar Awang Tengah ke mega Kaban Kunsil Nengeri (ADUN) Bukit Sari nyemetak madah, pengawa ngena teknologi baru deka dikemeratka ba perengka guna opis nya dikena ngenataika servis perintah enggau efisyen agi.

"Aku ngarap enggau perengka guna baka tu, kerejasama entara opis perintah deka manah agi sereta servis ke diberi ngagai rayat mega efisyen agi,”ku iya baru.

Sama datai ba maya nya, Kaban Parlimen Lawas, Dato Henry Sum Agong, Residen Sitak Limbang, Unus Tambi, Pegawai Pelilih Lawas, Ladin Atok, Sekretari Politik Premier Sarawak, Awgku Jinal Abedin Dato Pengiran Jawa enggau Injinir Sitak Limbang, Ir Mahathir Jokeni. -EDISI UKAS