KUCHING: Perintah Sarawak nengah Opis Menteri Pengangkut Sarawak (MOTS) majak ransing nentuka pengelantang nembiak nengeri tu ke belajar ba menua bukai nengah pengawa meri subsidi tiket bilun enggau nambah penyuah penerebai bilun maya hari besai.

Menteri Pengangkut Sarawak, Dato Sri Lee Kim Shin madah, inisiatif Graduet Pulai Sarawak (iGPS) udah meri pemaik ngagai 13,714 nembiak Sarawak sepemanjai taun 2024.

Ku iya, program tu ngulihka nembiak ti patut bulih subsidi RM300 ungkup tiap pejalai pulai ngagai Sarawak ari Semenanjung Malaysia, Sabah tauka Labuan naka dua kali setaun.

“Peminta ulih digaga sepemanjai taun nengah website yayasansarawak.org.my tauka aplikasyen Yayasan Sarawak Student lalu meseti dikenataika ba timpuh 60 hari sepengudah hari bulan terebai," ku iya.

Iya madah munyi nya maya nyimpul jaku opis menteri iya ba Aum Kunsil Nengeri (DUN) Sarawak Ke-19, Hari Satu.
Berebak enggau nya, iya madah, bala ke ulih minta nyengkaum peranak Malaysia ke beumur 18 taun ke atas, apai tauka indai asal ari Sarawak sereta nampung pelajar ba nengeri bukai.

Kelimpah ari nya, nembiak Sarawak ku iya bela nerima bantu subsidi tiket bilun Perintah Besai nengah program FlySiswa nengah Opis Menteri Pengangkut Malaysia.

Program tu udah meri pemaik ngagai 16,044 nembiak ari Sarawak ba taun 2024 enggau subsidi sepenyampau RM400 siku.
“Peminta FlySiswa dibuka ari 1 Januari ngagai 30 November 2025 nengah website flysiswa.mot.gov.my, lalu subsidi ulih dikena nyentuk 31 Disember 2025,” ku iya madah baru.

Dikena nentuka mayuh agi rayat Sarawak ulih pulai ngintu pengerami ba menua diri, iya madah, opis menteri iya mengkang bekerejasama rat enggau Opis Menteri Pengangkut Malaysia sereta kompeni penerebai bilun dikena nambah penyuah penerebai bilun maya hari besai.

Ku iya, maya Taun Baru China suba, bisi 98 penerebai bilun udah disediaka Malaysia Aviation Group (MAG), AirAsia enggau Batik Air, lalu maya Hari Raya Aidilfitri, bisi 46 penerebai bilun bela disedia.

“Maya Gawai Dayak ke deka datai, bisi 28 penerebai bilun udah diatur AirAsia, Malaysia Airlines enggau FireFly ari Kuala Lumpur, Johor Bahru sereta Kota Bharu ngagai palan di Sarawak baka Kuching, Sibu enggau Miri,” ku iya nerang. -EDISI UKAS