KUCHING: Dua pakej projek infrastruktur ari Kuching Urban Transportation System (KUTS) udah tembu digaga.

Menteri Pengangkut Sarawak, Dato Sri Lee Kim Shin madah, tu ngelai pemujur Sarawak ba pengawa ngemansangka sistem pengangkut mensia mayuh ti meruan ngena kuasa hidrogen.

Ku iya, dua pakej ke udah tembu nya nyengkaum pengawa nyeleti Depoh Rembus enggau 'Proof of Concept' jalai tiga kilometer pemanjai di Samarahan.

“Tu siti pemujur besai ba renggat keterubah projek KUTS ti ngelai pengeransing perintah nengeri nyungkak transformasyen pengangkut gadung enggau meruan," ku iya.

Iya madah munyi nya maya nyimpul jaku opis menteri iya ba Aum Kunsil Nengeri (DUN) Ke-19, Hari Satu.

Semua projek bisi enam pakej infrastruktur udah diberi nengah projek nya.

Empat agi pakej nyengkaum Pakej Infrastruktur Depoh Rembus, Blue Line 1, Blue Line 2 enggau Red Line benung digaga.
Kelimpah ari nya, Pakej Green Line diatu ba renggat nyendia proses tender.

Nyentuk April 2025, pemujur ke bendar renggat keterubah agi ba tikas 29.89 peratus.-EDISI UKAS