KUCHING: Perintah Sarawak nengah Opis Menteri Pengangkut Sarawak (MOTS) udah nyiri kompeni konsultant antarabansa ari Belanda, NACO (Netherlands Airport Consultants) bejalaika pengawa mansik pengulih (PCB study) projek ngaga Padang Bilun Antarabansa Kuching ti baru.

Menteri MOT, Dato Sri Lee Kim Shin madah, surat chiri udah disua ngagai NACO kena 21 Mei tu tadi.

Ku iya, kompeni nya deka bekerejasama enggau konsultant menua tu - Injinir Jasa - dikena bejalaika pansik silik.

“Pengawa nyiri tu digaga nengah proses ti nitih atur enggau tadbir urus ke bisi," ku iya ba aum media di Kunsil Nengeri (DUN) Sarawak ditu, Hari Satu.

Berindik ari nya, iya mega madah, NACO dipilih bepelasarka tisih ngagai pengulih teknikal, langgur pekara wang sereta peneleba ba bidang pemansang infrastruktur penerebai bilun.

“NACO ngembuan lebih 75 taun peneleba lalu udah ngaga lebih 700 projek padang bilun ba renggat global, nyengkaum Padang Bilun Antarabansa Hamad di Doha, Changi di Singapura, Incheon di Korea Selatan, Frankfurt di Jerman enggau Schiphol di Amsterdam,” ku iya nerang.

Nambah ke jaku iya, Dato Sri Lee madah, pansik nya ke deka digaga ngaul macham komponen besai, nyengkaum milih palan, pansik ruang langit, meresa empas ngagai rampa menua enggau rama, melaba peminta nepan bilun enggau kargo, analisis makit sereta perambu pun konsep padang bilun.

“Bela diberi perati iya nya elemen pengetan ngagai ubah klimet sereta nitih ke guna undang-undang enggau atur,” ku iya baru.

Ku iya nerang, ungkus projek deka ditentu sepengudah pansik nya tembu digaga, dikena nentuka belanja nya bepelasarka data.

“Pengawa nyiri konsultant antarabansa ti bepenemu tu siti singkang strategik dikena nentuka projek besai tu dilanggur enggau betul sereta nitih tikas global," ku iya.-EDISI UKAS